Мейлан Нежефов

Сентябрин 3-дилан 10-дизкьан Хив райондин саки вари мектебариъ «Учу террориз къаршу вуча» кIуру темайиан серенжемар кIули гъушнийи.

 

Му йигъари мектебариъ тялукь вуйи ачухъ дарсар тувбан, ватанпервервалин шиърар урхбан, тарихнахъди аьлакьалу кроссвордар арцIбан, цалин газатар каъбан ва бицIидарин улариинди ислягьвал фици рябкъюраш, шиклар зигбан талитар кIули гъушну.

Мидланра савайи, 20 йис улихьна Бесландиъ, 25 йис улихьна Дагъустандиъ, цци 23-пи июнди Дербент ва Мягьячгъала шагьрариъ гъахьи пис гьядисйирикан ктибтури, гьадму женгариъ иштирак гъахьи ватанперверарихъди ва гъи Украинайиъ хусуси метлеб айи дявдин операцияйиъ иштирак шулайи кьягьяларихъди урхурайидарин гюрюшарра гъахьнийи.

Райондин кьюб мектебдиъ урхурайи баяр-шубарихъди сюгьбат гъубху Кьягьялвалин ордендин ва жара медаларин сагьиб, Дагъустан халкьдин Игит Мевлюдин Гьямзатовди гьамци кIура: «Гьюрматлу баяр-шубар! Террориз я дин, я ватан, я миллет, я хал-хизан, я аба-баб аьгъдар. Хъа гьамрар аьхю гьюрматниинди фикриъ уьрхюб гьарсар касдин буржарикан ву, му инсанвалин заан дережайин лишанра ву. Уьмрин мянара гьамдиъ а. Магьа йизра му инсанвалин имтигьян тувру вахт гъафну. Ватандихьна вафалувал гьисс апIури, йиз хушниинди аьрза дибикIну, СВО-йиз гъушнийза. Ватандиз вафалуди гъахурайи женгариъ сакьат духьну, гъи магьа ичв улихь дийигъназа. Ватандин гъуллугънаъ ади узу мици гъахьну пну, саб жизбикьан швумал дарза. Йиз кьисматниин, гьамци герек вуйи йигъан Ватандиз узу бакар хьувалиин шад вуза. КIваинди гъибтай, эгер ухьу ижми гъурдси, ватан уьбхюз гьязурди гъахьиш, гьич сабвахтнара гъаних душман ухь’ин гъалиб хьидар. Хъа думу гьаци вуйибдиин узу инанмиш вуза. Думу ихь дагъустанлуйирин ифдиъ айиб ву, жараси хьуз мумкинра дар».