Зубайдат Шябанова

Улихьна йигъари Табасаран райондин Ярса гъулаъ думу гъулан дишагьли Наиля Аьлибеговайи чан гъийиху баярин гьюрматназ дивнайи цIийи мист ачмиш гъапIну. Аьзиз Аьлибегов – хусуси метлеб айи дявдин операцияйиъ, гъа Шамилбег уьзриан кечмиш гъахьну.

 

КIваъ айи аьхю хажалатназ дилигди, му дишагьлийи гъянаъ аьгь апIуз даршлу учIвру дерд аку метлебариз илтIибкIну. Багъри гъулаъ мист тикмиш апIбиинди дугъу чан веледарин рюгьярихьна вуйи ккунивал улупну.
Мист абццбахъди аьлакьалу серенжемариз Табасаран райондин глава Мягьямед Къурбанов, СВО-йин иштиракчйирин арайиъ Урусатдин сарпи игит Нурмягьямед Гьяжимягьямедовдин дада Сапижат Мазаева, РД-йин Муфтиятдин Кьибла Дагъустандиъ вари ихтиярар айи вакил Мягьяммад Ражабов, райондиан хусуси метлеб айи дявдин операцияйиъ айи эскрарин багахьлуйир ва гъуландар гъафнийи.

Уч духьнайидариз Наиля Алибеговайи шлубкьан уж’вал апIуз теклиф дивну. «Йиз уьмриъ кьюр малайик гъахьивалиин гизаф шад вуза. Шлубкьан уж’вал апIури, ихь веледар бадали яшамиш духьну ккунду», – гъапну дугъу СВО-йиъ веледар айи бабарихьна илтIикIури.

Башсагълугъвалин гафар Мягьямед Къурбановдира гъапнийи: «Ухьу фицдар гафар гъапишра, кечмиш гъахьи баяр кьяляхъ гъюрдар. Сагъвал зяиф апIури, ккудудубкIру дерд-хажалат зигури хулаъ гъузайиз, йиз фикриан, ихь веледариз мянфяаьт кайи ляхнар, гьадму гьисабнаан мистар арццуб, кечмиш гъахьидарихъан ва гьамусяаьт СВО-йиъ айидарихъан дюъйир урхуб, гъуларин кючйириин дурарин ччвурар иливуб ва гьацира жара ляхнар сатIиди кIулиз адагъурайиш, хайир шуйи», – гъапну главайи.
Дугъу гьацира учв улихьнаси СВО-йиз гъушуваликан, гьадушваъ ватандашариин улуркьуваликан ктибтну.

Вари уч духьнайидариси, Сапижат Мазаевайира Аьлибеговарин хизандин дерд пай апIури, Наиля Аьлибеговайи кIулиз адабгъу ляхин СВО-йиъ айи эскрарин хайлин уьмрин юлдшариз, абйир-бабариз ужуб мисал шлуваликан гъапну.
ЦIийи мист Наиля Аьли-беговайинси, СВО-йиъ баяр гъийиху хайлин бабаринра юкIв саламат апIру йишв гъабхьну.