Улихьна йигъари Табасаран райондин администрацияйиъ, райондин глава Мягьямед Къурбановадин регьберваликкди Ватандин Аьхю дявдиъ гъалиб хьбаъ 75-пи йис къайд апIбаз вуйи серенжемариз гьязурлугваларихъди аьлакьалу вуйи совещание кIули гъубшну.
«Гъалибвалин 75-пи йис къайд апIуб 2020-пи йисадин варитIан асас ва мяналу гьядиса ву. Гъи улихь дийибгънайи варитIан важиблу вазифа, гъузну имбу дявдин ветеранариз ва иштиракчйириз хъайивал апIуб ву. Ихь ва гьюкуматдин терефнаан ветеранарин гьуркIну ккуни гъуллугъар вари тамам дапIну ккунду», — гъапну Мягьямед Къурбановди.
Райондин администрацияйин пресс-гъуллугънаан вуйи мялуматариинди, Гъалибвалин Йигъахъди аьлакьалу вуйи серенжемарихьна гьязур хьуз ва улихь дивнайи вазифйир тамам апIуз вуйи гьязурлугвалин комитетра тешкил дапIна.
Гъалибвалин Йигъахъди аьлакьалу вуйи серенжемарин дахилнаъди райондиъ ватанпервалин жюрбежюр акцйирра гъягъиди ва Ватандин Аьхю дявдин ветеранар юбилейин медаларихъди тебрик апIиди.
