Улихьна йигъари «Дагестанская правда» газатдин редакцияйиъ, РД-йин гъулан мяишатдин ва ипlру-убхъру сурсатарин министрин заместитель Эмин Шайхгьясанов ва министерствойин маларик тарагъру уьзрариз аьксивалин серенжемар тешкил апlру ва дурарин гюзчивал гъабхру отделин начальник Зубайру Нурмягьямедов, РД-йиъ айи Россельхознадзорин Управлениейин отделин начальникдин заместитель Иван Кериллов ва малдарвалин сурсатар гьязур апIурайи «Нур» КФХ-йин регьбер Мягьямед Гьябибулаев иштирак духьну, чарасуз вуди электрондин сертификация апIбан «Меркурий» къайдайин ва дидихъди аьлакьалу месэлйирин гьякьнаан республикайин журналистарихъди гюрюш кIули гъухну.
Конференция ачмиш апIури, министрин заместители къайд гъапIганси, гьамусяаьт республикайиъ йиккун ва никкдин сурсатарин кьимат за хьувал дурар «Меркурий» къайдайиъ гьисабназ гъадагъурайивалихъди аьлакьалу дар.
«Мялум вуйиганси, «Меркурий» къайда ишлетмиш апIури, кьюд йискьан шула. Асас вуди думу малдарвалин сурсатарихъди хъади шлу ветеринарияйин документар электрондин жюрейиз илтIикIурайи къайда ву. Гьамусадизкьан думу документар кагъзарик гьязур апIурайи. Улихьди документар гьязур апIруган, гизаф вахтра гъябгъюйи харжарра удучIвуйи ва гъулайсуздира шули. Гьаддиз, гьацдар артухъ ляхнар арайиз дяргъбан бадали, гьаму къайдайиинди ляхин ккабалгну, электрондин сертификация апIура. Янаки, гьамусяаьт малдарвалин сурсатарихъди ляхин апIурайи касарихьан гьаму вари ляхнар чпин хулаъ дусну имиди, саб манаткьан харж дарапIди апIуз шулу», — кIурайи Эмин Шайхгьясановди.
Чан удучIвну улхбаъ Зубайру Нурмягьямедовди республиикайиъ айи ветеринарияйин участокарикан ва думу цирклиъ лихурайи духтрариканра гъапнийи. Дугъан гафариинди, гъи ихь республикайиъ ветеринарияйин 50участок а. Гьадму участрокариз дахил шулайи 728 маларин духтрарихьан «Меркурий» къайдайиинди ляхин апIуз шула. Янаки, дурар вари гьадушваъ гьисабнаъ дийигъна.
«Пуз ккундузузки,гьамусяаьт Дагъустан Республикайиъ му къайдайиъ 67 агъзуртIан артухъ аьрзйир гьисабназ гъадагъна. Дурарикан 9866 аьрза дилаварчи касарихьан, 11 агъзуртIан артухъ — юридический ва 45 арзуртIан артухъ — физический касарихьан дуфнайидар ву. Аьрзйир тувбан кьадар мидиз улихь йисаритIан гизаф улихь дубшна. Гьаци вушра, гьелелиг диди 25%-тIан тяйин апIурадар. Гьаддиз малдарвалин сурсатарихъди ляхин апIурайи вари касар чарасуз вуди му къайдайиъ гьисабнаъ дийигъну ккунду. «Меркурий» къайдайин электрондин сертификация апIбиинди ухьхьан республикайин жара йишвариз гъахурайи ва ухьухьна хурайи малдарвалин сурсатарик тарагъру уьзур каш ва ветеринарияйин гьякьнаан дурарин ери фициб вуш, ахтармиш апIуз шулу», — къайд гъапIну отделин начальникдии.
Конференция аьхирихъна гъюри, Иван Керилловди чпин управлениейи «Меркурий» къайдайин гьякьнаан гъахурайи ляхнарикан, хъа «Нур» КФХ-йин кIулиъ айи Мягьямед Гьябибулаевди «Меркурий» къайдайин электрондин сертификация апIбиинди гъахьи дигиш’валарикан ктибтнийи. Серенжем гюрюшдин иштиракчйириз уч духьнайи журналистарин суалар тувбиинди ккудубкIнийи.
