Гюльнара Мягьямедова
Дагъустан Республикайин Халкьдин Собраниейин заседанйир гъахру залиъ чпин хушниинди военный контракт гъийибтIдарикан ибарат дубхьнайи «Каспий» батальондиз женгнан пайдагъ тувбан серенжем кIули гъубшну. Региондин кIулиъ айи Сергей Меликовди пайдагъ батальондин командир Табир Маликовдихьна тувну.
Серенжемдиъ республикайин министрар, региондин парламентдин депутатар, батальондин гъуллугъчйир, хусуси метлеб айи дявдин операцияйин иштиракчйирин хизанар, жямяаьтлугъдин вакилар ва гьацира жарадар иштирак гъахьнийи.
Сергей Меликовди женгнан пайдгъин мяналуваликан гъапнийи. «Ухьу хусуси метлеб айи дявдин операция гъябгъюрайи йишваъ сад йисан чпин улихь дивнайи месэлйир гьял апIурайи «Каспий» батальондихьна женгнан пайдагъ тувбан серенжемдиз уч духьнахьа. Женгнан пайдагъ думу Урусатдин эскрин рюгьнан ижмивалин, мюгькамвалин, жвуван Ватандиз вафалу ва буржлу вуйивалин лишан ву. Пайдагъ эскрарин частнан юкIв ву. Гьадму пайдгъиккди эскрин хасият лигим, дугъан кьувват ва намуснан бина ижми шула», – гъапнийи республикйин кIулиъ айири.
Сергей Меликовди «Каспий» батальондин дахилнаъди чпин улихь дивнайи дявдин месэлйир намуслувалиинди гьял апIру эскрариканра ктибтнийи.
«Батальонди ккадапIнайи рякъ гизафдариз чешне ву. Учв’инди Дагъустанди дамагъ апIура. Гъи ичв хилиъ пайдагъ иври, умудлу вуча: думу мюгькам хилариъ а. Ихь батальонди чпин улихь дивнайи женгнан ва гъуллугънан вари месэлйир лайикьлуди тамам апIура, думу ижмиди Урусатдин гъаравлиъ дийибгъна.
«Каспий» батальондин эскрари кадабгънайи рякъ читинуб вуйибдин гъавриъ ахьа. Хъа учву, хусуси метлеб айи дявдин операция гъабхурайи йишваъ айи вари дявдин гъуллугъчйириси, кIваинди гъибтай: вари республикайи учвхъан ва ичв хизанарихъан юкIв убгура», – гъапнийи региондин кIулиъ айири.
Серенжемдин дахилнаъди «Каспий» батальондин эскрариз гьюкуматдин наградйирра тувнийи.
Батальондин командир Табир Маликовди эскервалин гъуллугънаъ айидарин терефнаан Дагъустандин Главайиз, хусуси метлеб айи дявдин операцияйиз кюмек туврайи гьарсар касдиз чухсагъул мялум гъапIнийи.
