Гюльнара Мягьямедова
29-пи октябри Москвайиъ вари Урусатдин Патриарх Кирилл Дагъустандин Глава Сергей Меликовдихъди гюрюшмиш гъахьну. Думу гюрюшдиъ Дагъустандин муфтий, шейх Аьгьмад Афанди Аьбдулаев, Мягьячгъалайин ва Грозныйин архиепископ Варлаам иштирак гъахьнийи.
Дурари гьюкмин органари ва динарин вакилари миллетарин ва конфессйирин арайиъ сабвал мюгькам апIбан, жигьилариз рюгьнанна эдеблувалин тербия тувбан месэлйир гьял гъапIнийи, гьацира мектебариъ урхурайидарин алабхьру палатдин месэлара гъитIибккнийи.
Дагъустан Республикайин Главайихьинди илтIикIну, Урус православный килисайин кIулиъ айири гьамци гъапнийи: «Сергей Аьлимович, учу уву апIурайи ляхнихьна аьхю гьюрмат ади лигурача. Ихь Ватан уьбхюри гъуллугънаъ гъахьи вахтнан тажруба ишлетмиш апIури, Первердигарин кюмекниинди, Урусатдиъра кмиди саламатвал асиллу шулайи Дагъустандиъ ислягьвал уьбхюз увхьан шул кIури, ижми умуд кивраза».
Патриарх Кирилли муфтий Аьгьмад Афанди кIулиъ айи мусурман уммайи региондин уьмриъ уйнамиш апIурайи важиблу рольра къайд гъапIнийи: «Дагъустандин аьхюну пай мусурмнари увуз лайикьлу гьюрмат апIура. Мидланра савайи, уву республикайиъ жара дин хъапIрайидаризра кюмек апIуз гьязур вува. Думу яв ляхнизра аьхю чухсагъул», – гъапнийи Патриарх Кирилли.
Патриарх Кирилл Мягьячгъалайин ва Грозныйин архиепископ Варлаамди республикайиъ кIули гъабхурайи важиблу ляхниз заан кьимат тувнийи ва дугъаз сабур, фагьум ва зигьим ккун гъапIнийи.
Патриарх Кирилли вари Урусатдиз тясир гъапIу июндин 23-пи йигъан гъахьи пашман гьядисйирра кIваин гъапIнийи. КIвак аьхю хажалат кади дугъу къайд гъапIганси, думу гъавриъ ахъуз даршлу саб дюшюш дар.
«Дагъустан ихь миллионариинди инсанар яшамиш шулайи, гизаф миллетар, жюрбежюр дин хъапIрудар айи уьлкейин важиблу регионарикан саб ву. Дагъустандиъ ва сабишв’индии Кафари Кавказдиъ жара дин хъапIрударин арайиъ айи аьлакьйирикан уьлкейиъ айи «гьава» асиллу ву», – къайд гъапIну патриарх Кирилли.
Дагъустандин Главайи республикайин гьюкмарин ляхниз заан кьимат дивбаз, Патриархдиз чухсагъул мялум гъапIну. Сергей Меликовди гъийин Дагъустан география жигьатнаанси, гизаф миллетар ва дин хъапIрудар айивалииндира Урусатдин бицIи кIалиб вуйиваликан гъапну. «Гьаддиз гъи Дагъустан мюгькамвал ахтармиш апIру майдан дубхьна: эгер мушваъ саб бязи читин месэлйирин улихь дурум тувуз дархьиш, думу месэлйир вари Урусатдиъра арайиз адагъуз хъюгъди. Гъи учу албагну, сатIиди гъузуз мумкинвалар агурача. Яв марццивал, республика, дугъриданна, уву гъапиганси, ихь аьхю уьлкейин бицIи кIалиб ву, учу ихь аьхю Ватан – Урусат уьбхюз фици гьязур вуш, Кавказдиъ айи бицIи кIалибра учу гьаци уьбхидича», – гъапну Дагъустандин кIулиъ айири.
Гюрюшдин дахилнаъди Дагъустандин муфтийиз Урусатдин Православный килисайин заан награда – Машгьурвалин ва Намуснан (2-пи дережайин) орден тувну. Дагъустандин муфтийди чаз туву награда вари республикайин, региондин мусурмнарин зегьметариз тувнайи кьиматси гьисаб апIури, Патриарх Кириллиз чухсагъул мялум гъапIнийи.
«Гьаму награда миллетарин арайиъ аьлакьйир мюгькам апIбаъ диндин улихь хьайидарин ляхниз тувнайи кьимат ву. Думу сабвалин ва албагнайивалин чешне даринхъа? Ухьу жара динар хъаърашра, уьмриз жараси лигурашра, садар фикрар ва метлебар айи Урусатдин саб халкьди гъузрахьа», – гъапнийи Сергей Меликовди.
