Гюльнара Мягьямедова
Мягьячгъалайин военный комиссар Геннадий Къурбановди хусуси метлеб айи дявдин операция гъабхурайи йишвариз гьаузра кади контрактдиинди военный гъуллугъназ харижи уьлкйирин агьалйирра гъадагъурайиваликан ктибтну.
Дугъу къайд гъапIганси, гизаф ватандашариз контрактдиинди гъуллугъ апIувал, Урусатдин милли ихтиярар уьрхбак чпин пай кивувалилан гъайри, эскервалин пише гъадабгъувалра шула.
Гъубшу йисандин натижйириинди, Мягьячгъалайиан варжариинди агьалйири чпин хушниинди Урусатдин оборонайин министерствойихъди контрактар гъийитIну. Аьрзйир туву ватандашаригъян къанундин къайдайиинди гъядягъну, дурар гъуллугъ дубхну ккуни кьушмарин жюрбежюр частариз гьаъну. Военкомди гъапиганси, контрактдиинди гъуллугъ апIуб – думу, ужуб гъазанж ва яшайишдин льготйир гъадагъувалси, уьлкейин хатIасузвал уьбхбак лайикьлу пай кивувалра ву.
Геннадий Къурбановди чан улхбаъ хусуси метлеб айи дявдин операцияйиъ гъуллугъ апIуз ккунидарин арайиъ Урусатдин ватандаш’валиъ учIвнайи харижи уьлкйирин агьалйирра айивализ асас фикир тувну. Харижи уьлкйирин хайлин вакилар урусатдин жямяаьтлугъдин саб пай духьна, дурар РФ-дин Яракьлу кьувватарихъди контракт йибтIуз ва дявдин месэлйир тамам апIурайи йишваз гъягъюз гьязур ву.
«Контрактдиинди гъуллугъ апIуз, асас вуди хусуси метлеб айи дявдин операция гъабхурайи йишваз гъягъюз разивал тувували, дурарин жавабдарвалин ва вафалувалин заан дережайикан шагьидвал апIура», – къайд гъапIну Мягьячгъалайин военный комиссари.
Мягьячгъалайин военкоматдиз Урусатдин Федерацияйин Яракьлу кьувватарин жергйириъ гъуллугъ апIуз ккунди, Египетдин агьали, Урусатдин ватандаш Генид Аьгьмад Ибрагьим Мустафа илтIикIну.
Дагъустан дишагьли хпирди духну, республикайиъ яшамиш шули, му касдин 15 йистIан артухъ ву. Дурариз шубур веледра а. Урусатдин ватандаш духьну, дугъан 3 йис ву. Улихьна йисари Генид Аьгьмад гостиницйирин бизнесдиъ лихури гъахьнушра, дугъан военный ляхнихъ гьаммишан юкIв хъади гъабхьну.
«Узуз Дагъустандиъ яшамиш хьуз кьабулди вузуз. Мушваъ узу ужуди къаршуламиш гъапIну, рюгьнан багахь вуйи инсанарра гъидихъунзуз. Урусат йиз багъри халси дубхьназуз, гьаддиз, узуз гьамкьан ужувлар гъапIу уьлке уьбхбак йиз пайра кивуз ккундузуз», – гъапну Генид Аьгьмадди.
