Наргиз Гюлечова
Дагъустан Республикайиъ инсанар яшамиш шлу гизаф мертебйирин хуларин кьадар, гъийин йигъаз вуйи улупбариинди, 532 851 дубхьна. Гизаф мертебйирин хулариъ гьял дапIну ккуни читин месэлйирра фукьан вушра гъузна. Дидин гьякьнаан, ккудубшу йисан гъапIу ляхнарин натижйир йивури, 15-пи январи кIули гъубшу пресс-конференцияйиъ республикайин Госжилинспекцияйин (ГЖИ) кIулиъ айи Сергей Касьяновди мялуматар тувну.
Сергей Касьяновдин гафариинди, ккудубшу йисандин арайиъ Дагъустандин ГЖИ-йин адресназ 4661 аьрза гъафну.
«Пуб лазим вуки, гъюрайи аьрзйирин кьадар йислан-йисаз кам шула. Мисал вуди гъадабгъиш, сач дурарин кьадар 5360, сурчан – 5585, хъа 2021-пи йисан 6596 вуйи. Республикайин агьалйирихьан гъафи аьрзйирикан варитIан гизаф (1668 аьрза) асккан ерийин коммунальный шараитарин гьякьнаан ву. Аьрзйир гьацира электроэнергияйихъди, газрахъди, манишнахъди, мани ва мичIли штухъди аьлакьалу вуйи.
Гъийин йигъан учу фукьан гизаф ляхин гъабхури ашра, гьял дапIну ккуни месэлйир цIиб гъузнадар. Гизаф мертебйирин хулариъ яшамиш шулайи касарикан 57%-тIан артухъ агьалйири чпи яшамиш шулайи хуларин идара апIру тешкилатари (УК) тамам апIурайи ляхнариин зат рази даруваликан кIура. Хъа 18% агьалйири, чпи яшамиш шулайи хулар, эйси хъадрударси духьна кIури, аьрзйир тувна. ИкибаштIан, мушваъ кьюбрид терефарра тахсиркрар ву: агьалйири варидари, чпи ишлетмиш апIурайи коммунальный игьтияжарихъ лазим вуйи саягъниинди пул туврайибси улупура, хъа УК-йири кIуруш – чпи ляхин апIурайибси… Гьякьикьатдиъ, гьамрарира, гьатрарира кучIлар апIура. Натижайиъ хулар йирси шула, хулариъ айи лифтар уьргъюра», – гъапнийи ГЖИ-йин кIулиъ айири.
Сергей Касьяновди мялум гъапIганси, ккудубшу йисандин арайиъ Госжилинспекцияйи республикайин аьтрафариин 846 ахтармиш апIбанна гюзчивалин ляхнар кIули гъухну. Натижайиъ, чпиин али вазифйир лазим вуйи саягъниинди тамам дарапIрайивализ лигну, гизаф мертебйирин хуларин идара апIру тешкилатариина 5 миллионна 600 агъзур манатдин журум илибтIну ва агьалйири коммунальный игьтияжарихъ тувнайи пуликан 6 миллион манат цIийикIултIан гьисаб (перерасчет) гъапIну.
