Аьгьмедхан Мазанов (шиклиъ – арчлахъанди сарпир) 1996-пи йисан 20-пи декабриъ Мягьячгъала шагьриъ яшамиш шулайи табасаран хизандиъ бабкан гъахьну. Дугъан адаш Маликшагь ва дада Марина Хив райондин ГъуштIил гъулан агьалйир ву. Советарин Союз дабгъбан кьяляхъ улуркьу читин йисари жигьил хизан Ивановский областдин Тейково шагьриз удубчIвну гъубшнийи.
2003-пи йисан Аьгьмедхан Тейково шагьрин 2-пи нумрайин мектебдин сабпи классдиз урхуз гъушнийи ва 2014-пи йисан дугъу думу мектеб ужудар хъуркьувалариинди ккудубкIнийи.
Аьгьмедхан байвахтнахъан мина спортдиин машгъул вуйи. Дугъу 2008-пи йисхъан мина дзюдойиан ва самбойиан чпи яшамиш шулайи шагьриъ, Ивановский областдиъ, Урусатдин дережайиъди кIули гъягъюри гъахьи жюрбежюр талитариъ пешкешнан йишвар дисури гъахьну. 2013-пи йисан спортдин мектебдин терефнаан Аьгьмедхандиз «Гъизилин бицIир» кIуру премияра тувнийи.
Мектеб ккудубкIган, бали пише ктабгъувалиин гизаф фикрар гъапIундар, фицики дугъаз учв фунуб пишейин эйси шулуш, мектебдин бицIи классариъ урхури имиди аьгъю дубхьнайи. Мектеб ккудубкIу йисан Аьгьмедхан Санкт-Петербург шагьриъ Михайловский дявдин артиллерияйин академияйин «Хусуси метлеб айи автоматламиш дапIнайи гъурулушар ишлетмиш апIувал» (Росгвардияйиъ артиллерия ишлетмиш апIувал) отделениейиъ урхуз кьабул гъапIну. Дугъан байвахтнахъан мина кIваъ айи хиялар кIулиз удучIвну.
Академияйиъ урхуз рягьятди вуйи гъапиш, му гафарихъ сарихьанра хъугъуз даршул. Душваъ урхурайидарихьна вуйи тIалабар варидарихьан хъайи-хъайиси тамам апIузра шулдар. Академияйиъ, ужудар аьгъювалар айивалилан савайи, эскервалин низам-къайда уьбхювал, бедендин гьязурлугъ’вал улупуб чарасуз лазим ву.
Академияйиъ урхуз хъюгъю садпи йигъарилан мина Аьгьмедханди учв гьарсаб ляхин кIулиз адабгъуз шлу, аьгъюваларихъ юкIв хъайи курсант вуйиб улупну. Аь.М. Мазановди 2017-пи йисан Саратов шагьриъ кIули гъушу Урусатдин армияйин «Артиллерияйин цIа йивбан устадар – 2017» талитариъ кьюбпи йишв гъадабгъну. Бализ гьаму жюрейин медалар, грамотйир гизаф а. Дугъу чан пишекарвалин аьгъювалар ва спортдин хъуркьувалар Ватан уьбх-бан пише гъадабгъбаз сарф гъапIну.
2019-пи йисан Аьгьмедхан Мазановди академия ужудар хъуркьувалариинди ккудубкIну. Гьамус жигьил офицер, Ватандин саламатвал ва машгьурвал уьрхюри, Чечен Республикайин Наурский райондиъ гъуллугънаъ а.
«Табасарандин нурар» газатдин редакцияйин коллективди Аьгьмедхан Мазанов ва думу тербияламиш гъапIу абйир-бабар улубкьурайи Ватан уьбхрурин машкврихъди кIваантIан тебрик апIури, дурариз мюгькам сагъ’вал, кIван шадвал ккун апIура. Гъит, ихь дюн’яйиъ дявдин сесер затра даришри, завуъ гьарган ислягьвалин акв ибшри.
