Мейлан Нежефов
Гьаму йигъари Хив райондиъ Дагъустан Республикайин Халкьдин Собраниейин депутат Алавудин Мирзабалаевдин пешкешариз вуйи волейболин нубатнан турнир кIули гъубшну.
Меркездиан вуйи делегация Хив район ккебгърайи йишв’ин али тагъдикк райондин глава Ярмет Ярметовди ва ерли администрацияйин вакилари кьабул гъапIнийи. Турнир ккебгъайиз хялари райондин гьякимарихъди сатIиди АрхъитI гъулан агьали Альберт Эмирагъаевдин дакьатарихъ гьадму гъулаъ Ватандин Аьхю дявдиъ талаф гъахьи совет эскрариз вуйи кIваин уьрхбан ядигарихъ кюкйир дивнийи. Хъасин гьюрматлу хялар райондин спорткомплексдиз гъафнийи.
Турнириъ иштирак хьуз дуфнайи командйирин ва тамашачйирин улихь РД-йин Халкьдин Собраниейиъ Дагъустандин Главайин вари ихтиярар айи вакил Нюсрет Уьмаров, парламентдин депутатар Алавудин Мирзабалаев, ва Расим Гьяжиагъаев, Хив райондин глава Ярмет Ярметов удучIвну гъулхнийи. Серенжем Урусатдин ва Дагъустандин гимнар тамам апIбиинди абццнийи.
Турнириъ сабпи йишв АрхъитI гъулан командайиз гъабхьнийи. Кьюбпи йишв ГъуштIларин 1-пи командайи, шубубпи йишв ЗахитI гъулан командайи гъазанмиш гъапIнийи. Дурариз турнирин тешкилатчйири тялукь дипломар, кубокар, пулин конвертар ва пешкешар тувнийи. Мидланра савайи, гьюрматнан грамотйириинди ва пешкешариинди гъалибвалихьна вуйи гъати гьевес улупу ГъуштIил гъулан 2-пи команда, тамашачйири ва судйири турнирин варитIан ужур уюнбазси гьисаб гъапIу Фарид Ягъибеков (АрхъитI гъул), командйириъ тафавутлу гъахьи Артур Нурмягьямедов (ГъуштIил гъул), Эльнар Гьямзатов (АрхъитI гъул), Ислам Рамазанов (ГъуштIил гъул), Тимур Шихялиев (ЗахтIарин гъул) лишанлу гъапIнийи.
Турнирин уьмуми натижйир йивуб узу райондин культурайин, спортдин, жигьиларин политикайин ва туризмдин отделин кIулиъ айи Казбек Къазиевдикан ккун гъапIнийза.
– Ихь халкьдин депутат Алавудин Мирзабалаев кIулиъ ади, турнирин вари миди вуйи тешкилатчйириз, судйириз ва тамашачйириз аферин кIураза. Цци Ватандин Аьхю дяви ккудубкIну 80 йисандин гъаншариъ ухьу мицисдар турнирар райодиъ кIули гъахуб мешреб ву. Кьюбдри ужуйи гъабхьну му турнир 23-пи феврали кIули гъабхубра. Хив райондин агьали Алавудин Несрединовичди чан пешкешариз вуйи турнир кIули гъабхури, цци магьа 23 йис ву. Дугъриданра, думу райондин ватанперес ву. Дугъаз мюгькам сагъ’вал ва хъана артухъди кьувват ккун апIураза. Гьамци, хил-хилиз, гъюн-гъюниз йивну, сарин гъалибвалиин тмунур шад духьну, жанлувалиинди, баркаллувалиинди турнир кIули гъубху вари командйириз сабсан ражну чухсагъул мялум апIураза!» – гъапнийи Казбек Къазиевди.
