Омаров: народ ждет от нас решений
Гюлягьмяд Маллялиев
Гъи республикайин гьюкмарин заан идарйириъ лихурайи табасаран вакиларикан улхруган, сабпи нубатнаан Нюсрет Уьмаров кIваин шулу. Аьдати инсанариз гьякимарин артухъди маш ккади шулдар, вушра узуз инсанарикан Нюсрет Уьмаровдин терефназди вуйи наразивалин гафар гьелелиг гъеерхьундарзуз. Му ляхнин себеб гьаддму вуки, ихь ватанагьли, чахьна фуну месэла хьади илтIикIишра, ляхнииндира, насигьятнииндира кюмек тувуз чалишмиш шулу. Гъи Табасаран ва Хив районариъ кIули гъягъюрайи хайлин ужувлан гьяракатарикра дугъан лайикьлу пай ка.
Уьмаров Нюсрет Мягьямедович 1971-пи йисан 19-пи июли Хив райондин ГъуштIил гъулаъ бабкан гъахьну. 1993-пи йисан дугъу Дагъустандин гъулан мяишатдин институтдиъ «экономист-тешкилатчи» пишекарвал гъадабгъну. 1995-2008-пи йисари Дагъустан Республикайин экономикайин министерствойиъ жюрбежюр гъуллугъариъ лихури гъахьну, хъа 2008-2013-пи йисари Дагъустандин Президентдин финансарин зиин гюзчивал гъабхру управленийин отделин кIулиъ ади гъахьну. 2013-пи йисан думу РД-йин Главайин ва Правительствойин администрацияйиъ ляхниъ дийигъну, 2019-2020-пи йисари душваъ руководителин заместителди гъилихну.
2020-пи йисан аьхириъ Нюсрет Уьмаров Дагъустан Республикайин Правительствойин Председателин сарпи заместителди дерккнийи. 2022-пи йисан февралианмина гъийин йигъаз РД-йин Халкьдин Собраниейиъ Дагъустандин Главайин вари ихтиярар айи вакилди лихура.
Нюсрет Уьмаровдин гизаф йисарин арайиъ гъизигу зегьмет гьамцдар гьюкуматдин наградйириинди: «РД-йин яшайишдинна экономикайин артмиш’валик киву пайназ лигну» ва «Игитвалин зегьметназ лигну» медаларинди, Дагъустан Республикайин ва Дагъустан Республикайин Правительствойин гьюрматнан грамотйириинди лишанлу дапIна. Думу Дагъустан Республикайин лайикьлу экономист ву.
Эвленмиш духьна. Юкьур велед тербияламиш апIура.
