Зубайдат Шябанова

Рамазан вазлин сабпи ушв дибиснайи йигъан, Санкт-Петербург шагьриъ ва Ленинградский областдиъ яшамиш шулайи табасаранарин аьхю мажлис – сатIиди ушв гьибтувал кIули гъубшну. Лавландин ушв деебтру вахт хьайиз, думу серенжем гъабхуз ккайи «Амарант» ресторандиз табасаран ва Дагъустандин жара халкьарин вакилар уч хьуз хъюгънийи.

Серенжем Гирами Кьур’андиан аятар урхбалан ккебгънийи. Имамари уч духьнайидариз важиблу темйириан вяаьзар гъапIнийи, динагьлийирин юкIвар уткан сесеринди гъурху нашидари улдучнийи.

«Гъийин серенжем диндин мажлисра, ихь халкьар сатIи апIбаъ важиблу роль гъабхурайи серенжемра ву. Ухьу хъуркьувалихъна гъюбан бадали, гъиси сатIи духьну, саб аьхю хизанси гъузну ккунду», – гъапнийи ифтар тешкил гъапIу бизнесмен Марат Аслановди.

УдучIвну гъулхдарин арайиъ мажлис тешкил ва кIули гъабхбаъ кюмек гъапIу дилаварчи Нефтулла Гьяжиев, Табасаран райондин имамарин советдин кIулиъ айи Ансар Рамазанов, жюрбежюр шагьрариан дуфнайи табасаран халкьдин вакилар, духтрар, военный циркларин гъуллугъчйир ва жарадар айи.