Наргиз Гюлечова
Бахчайин культурйирин бегьер артухъ шула
Гьар йисан хьадукран фасил улубкьубси, ихь республикайин хутIлариъ тумар урзуз хъюгъра.
Гьябгъюрайи йисан Дагъустандиъ 8,2–8,5 агъзур гектар хутIлариъ бахчайин культурйир дурзну, саб гектариан 300 центнер уч апIури, 200 агъзур тоннайин бегьер ккадабцIуз планламиш дапIна. 2024-пи йисан кIуруш, улупнайи кьадар хутIлариан 224 агъзур тоннайин бегьер ккадабцIнийи.
Пуб лазим вуки, Дагъустандиъ гьясил апIурайи бахчайин культурйир Урусатдин хайлин регионарин, гьятта Уралин базрариъра кмиди масу тувра.
Жинснан чарвйирин выставка
15-пи майдиан 17-пи майдизкьан Каспийск шагьриъ айи Анжи Аренайин аьтрафариин шубубпи ражари Вариурусатдин жинснан чарвйирин выставка кIули гъябгъиди. Выставкайин тешкилатчйир Урусатдин гъулан мяишатдин министерство, Дагъустандин Правительство ва Марччлихънарин милли союз ву.
Му ражари шлуб юбилейный (XXV-пи) выставка ву. Му выставка Урусатдин гъулан мяишат артмиш апIбак пай киврайи мяналу серенжемарикан саб ву.
Выставка ихь республикайин ругариин гъабхбан асас мяна гьаддиъ аки, Урусатдиъ айи чарвйирин кьадарнакан варитIан гизаф (саки 5 миллион) чарвйир Дагъустандиндар ву. Гьаддиз мушваъ швнуб-саб жинснан чарвйирин мяишатар айивализра ва дурарин кьадарназра лигну, юбилейный выставкара ухьухь гъабхбанди къарар адабгъну.
Выставкайиъ ужударсдар жинснан марччаринна цIигьарин мяишатарси, цирклиъ ляхин апIурайи кIакIначи карханйирра иштирак хьиди. Гьацира душваъ чарвйириз сурсатар гьясил апIру, гьаму деврин тIалабариз жаваб туврайи алатарра улупиди.
Улихь ккимиди вуйи улупбариинди, XXV Вариурусатдин жинснан чарвйирин выставкайиъ ихь уьлкейин 13 региондиан 60-тIан артухъ жинснан марччар ва цIигьар уьрхюрайи мяишатар иштирак хьиди, ухьухьна илмин вакиларра ва чарвйирин сурсат гьясил апIурайи канханйирра гъиди.
ДагАгроКаспий ЭКСПО-2025
Улихьна йигъари Каспийск шагьриъ Аьли Аьлиевдин ччвурнахъ хъайи спорткомплексдиъ шубубпи «ДагАгроКаспий ЭКСПО-2025» гъулан мяишатдин форум кIули гъубшну. Думу форумдиъ Урусатдин регионарианси, багахь хьайи харижи уьлкйирианра 100-тIан артухъ компанйир иштирак гъахьнийи.
Асас вуди форумдиз гъулан мяишатдиъ ишлетмиш апIру гьаму деврин техника, жюрбежюр йимишар ва мейвйирин тумар, шид тувру гъурулушар, руг тартиб апIру пейинар ва хъана жара шей’ар духнайи. Форумдиъ хайлин гьюрматлу хяларра иштирак духьнайи. Гьадрарикан сар Субтропический гъулан мяишат артмиш апIбан академияйин генеральный директор Андрей Платонов вуйи.
Дугъу му жюрейин форум республикайиъ кIули гъабхбаъ аьхю мяна айиваликан, тропикарин ва субтропикарин культурйир гьясил апIуз Дагъустандиз ужудар мумкинвалар айиваликан гъапнийи. Гьаци, гъийин СтIал Сулейман райондиъ ерли инсанариз гьамусдиз таниш дару йимишар гьясил апIура.
Киви йимишдин варитIан аьхю багъ
СтIал Сулейман райондиъ айи киви йимишдин багъ Урусатдиъ варитIан аьхюб ву, думу 20 гектариин гьатIабццна. Му проект «Полоса» ООО-йи инвестицйирин программайин дахилнаъди уьмриз кечирмиш апIурайиб ву.
Дагъустандиъ му багъ ибтайиз улихьна варитIан аьхю кивйирин багъ Краснодар крайин Адлериъ айиб вуйи. Душваъ кивйир гьясил апIури, 60 йистIан артухъ ву. Гъи СтIал Сулейман райондиъ ибтнайи кивйирин багъдин проектра, Адлерин тажруба ишлетмиш дапIну, артмиш апIурайиб ву.
