Гъубшу гьяфтайиъ Табасаран райондин культурайин Хулаъ Ватан уьбхрурин Йигъаз бахш дапIнайи серенжем гъабхьну. Серенжем ачмиш апIури, Табасаран райондин депутатарин Собрандин председатель Аьлимягьямед Къазиевди уч духьнайи касар машкврихъди мубарак гъапIну ва РД-йин военный комиссариатдин Табасаран райондиъ айи отделин начальникдин заместителди лихурайи Надир Шихягьмедовдиз гаф тувну. Дугъу чан улхуб гьамци ккебгъну:
Гьюрматлу вуйи Ватан гъюбхю игитар! Учву Ватан уьбхрурин йигъахъди мубарак апIураза! Гьаму машкврин тарих 100 йистIан артухъ ву. Дидин швнуб-саб чвур иливнийи: Уьру армияйин Йигъ; Совет армияйин йигъ; Советарин армияйин ва гьюлериин али кьушмарин Йигъ.
1995-пи йисан дидин чвур гьюдюхну ва «Ватан уьбхрурин Йигъ» пуз хъюгъну.
Му машквриз аьхю мяна а – Ватан ккун апIувал ва думу уьбхювал.
15-пи январиъ Федералин Собраниейихьна вуйи чан илтIикIбаъ Урусатдин Президент Владимир Путинди къайд гъапну: «Урусатдиз варитIан гирами машквар 9-пи май ву. Ихь абйир-бабари гъазанмиш гъапIу гъалибвалариин ухьу рази вухьа. Дурарин игитвал уьбхюрахьа, думу уьбхювал ихь дурарихьна вуйи аьхю гьюрмат, гъюзимбу наслариз ужуб дарс ву диди ухьуз хъана артухъ гуж тувра, ихь сатIивал хъана артухъ апIура. Гъалибваликан гьякьлувал уьбхюз ухьу буржлу вухьа. Узуз Ватандин аьхю дявдиъ гъалиб гъахьи игитариз аьхю чухсагъул пуз ккундузуз, дурари дявдин вари читинвалариан кIул адабгъну, гъи ухьуз архаинвал ибшри кIури, ихь ватан азад гъапIну. Табасаран райондиъ кьюр кастIан имдар – Халагъ гъул’ан Гьясан Ражабов ва Дарвагъ гъул’ан Аьли Аьлиев. Ухьу дурариз лап кIваан жандин сагъ’вал ва ярхи уьмурккун апIурахьа», — гъапну дугъу.
Надир Шихмягьямедовди чан улхбаъ мялум гъапIганси, Ватандин Аьхю дявдин кьяляхъра, Ватан уьбхюри, ихь ватандашариз гизаф читин месэлйир гьял апIувал алабхъну, жара дявйириъра, гъалмагълариъра иштирак гъахьну. Гьаму улихьна йигъари ухьу Афгъанистандиан ихь кьушмар адаъну 31 йис хьпан серенжем кIули гъубхунхьа. Гьацира армияйиъ ва РОВД-йин жергйириъ гъуллугъ апIурайи ихь ватанагьлийири, буржи тамам апIури, Чечен Республикайиъ гъягъюрайи дявдин гьяракатариъ чпин женгар фида гъапIну, гьадму дявдин инвалидарра гъузна.
2015-пи йисхъан мина ихь яракьлу кьушмар Аьраб Республика Сирияйиъ игилихъди гъягъюрайи дявйириъ иштирак шула. Душваъ игитвал улупбаз лигну, ихь ватанагьли Рустам Мурадовдиз генерал-лейтенант кIуру чвур тувну.
«КIваълан гьархну ккундар ватан уьбхбак ихь армияйин жергйириъ гъуллугъ апIурайи дишагьлийирира аьхю пай кивра. Дурарира жиларихъди сабси женг гъабхура. Чпин жанарилан хил алдабгъну, ихь ватанагьлийир читинвалариккан ккадагъура. Гъи, гьякьлуди гъапиш, гьадрарин йигъра ву.
Гьамусяаьт ихь армия жвабдар касарин хилиъ а, думу йислан-йисаз цIийи алапIура. Му аьгьвалатну ихь гьюкуматдиъ гьаммишан сагъ-саламатвали агъавал апIрувалихъ, ихь кIул’ин марцци завар шлувалихъ ижмиди хъугъуз гъитра», — аьлава гаъпIнийи дугъу.
Серенжемдин аьхириъ дидиз уч духьнайи касаризрайондин культурайин гъуллугъчйири, искусствойин мектебдин халкьдин оркестр ива Хючнаанрин сабпи нумрайин мектебдиъ урхурайи бицIидари аьхю концерт улупнийи. Гьацира душваъ ДДТ-йиъ айи бицIидарин яратмиш апIбарин выставкара тешкил гъапIнийи.
