Табасаран шаирари, писателари ва бабан чIалнан дарсар киврайи мялимари, табасаран чIал зяиф шулайивализ лигну, дидиз аьхю фикир тувуз хъюгъну хайлин йисар ву. Гьяйифки, гъи ихь саспи мектебариъра бабан чIалназ, дидин гележегдин артмиш’вализ гьелелиг лазим вуйи дережайиъди фикир туврадар. 21-пи февраль вари халкьарин бабан чIалнан Йигъси къайд апIурайивалихъди аьлакьалу вуди, гъубшу гьяфтайиъ Дербент шагьрин ва Дербент райондин мектебариъ бабан чIалназ, думу артмиш апIбаз бахш дапIнайи гизаф серенжемар кIули гъушну.
Чинар гъулаъ литературайин гюрюш
21-пи февралиъ Чинар гъулан 1-пи нумрайин мектебдиъ кьюб миллетдин шаирарин – табасаран шаир Эльмира Аьшурбеговайин ва дарги шаир Хадижат Уьмаровайин яратмиш апIбариз бахш дапIнайи сатIи вуйи вечер кIули гъубшну. Мектебдин терефнаан яркьу программа гьязур дапIнайи: шаирарин уьмрарикан ва яратмиш’валарикан мялуматар, ялхъвнар апIувал, интерактивный доскайикан презентация саягъ туврайи жюрбежюр материалар ва шаирарин гафариз вуйи мяълийир. Мидланра гъайри, баяр-шубари аьшкьниинди суалар туври, шаирарихъди чIиви сюгьбатра кIули гъубхнийи.
Дербентдин культурайин ва жигьиларин политикайин управлениейин аьхюну пишекар Гюльпери Шябановнайи Эльмира Аьшурялиевнайин драматургияйин эгьемиятлуваликан, дугъан яратмиш апIбари жигьил наслиз тербия тувбаъ уйнамиш апIурайи роликан гъапнийи.
Дербентдин 3-пи нумрайин мектебдиъ литературайин мярака
22-пи февралиъ Дербентдин 3-пи нумрайин мектебдиъ урхурайи табасаран бицIидарин ва дурариз дарс киврайи мялимарин табасаран шаир Эльмира Аьшурбеговайихъди гюрюш кIули гъубшну. Гюрюшдиъ бабан чIалниинди шиърар урхувал, ихь чIалнакан, литературайикан, театрикан жанлу ихтилатар, бабан чIалназ таржума дапIнайи «Паччагьдин гъакIи шуркан ва ургур багьадурикан вуйи махъв» урус чIалниинди бицIидари, хъа ихь чIалниинди таржума гъапIу автори урхури, тевувал ва жара сюгьбатар гъахьнийи.
Эльмира Аьшурбеговайи баяр-шубариз, гележегдиъ пише ктабгъруган, бабан чIал аьгъювал аьхю кюмек хьуз мумкин вуйиваликан гъапнийи. «Белки, ичв арайианра гележегдиъ шаирар ва журналистар удучIвур», – чан умуд ачмиш гъапIнийи дугъу бицIидариз.
Рубас гъулан мектебдиъ баяр-шубарихъди шаирин гюрюш
21-пи февралиъ Рубас гъулан мектебдин мялимарихъди ва баяр-шубарихъди ихь бажаранлу шаир, чIалнан устад Гюльбика Уьмарова гюрюшмиш гъахьнийи. Цци, 2020-пи йисан, Гюльбика Уьмаровайин бабкан духьну 60 йис тамам шула. Му мярака тешкил гъапIур мектебдиъ хайлин йисари мялимвал апIурайи, бабан чIаларин методист-валин ляхин гъабхурайи Секинаханум Эльдирханова вуйи.
Мектебдин директор Салават Мусаевди чан коллективдихъди сатIиди шаир гьюрматлувалиинди кьабул гъапIнийи. Бабан чIалназ бахш вуйи мярака шаири гъибикIу «Рубас нир» кIуру мяълийинди ккебгънийи. «Гьюрматлу баяр-шубар, мялимар ва хялар, ихь машгьур шаир Гюльбика Уьмарова, табасаран бицIидаризси, дагъустан бицIидаризра таниш ву. Дугъан бицIидариз вуйи хайлин шиърарин, аьхюдариз вуйи ва жара чIалариз таржума дапIнайи китабарра чапдиан адагъна. Гъи мицир шаир уьхьухьна гъювал – му ихь чIаланаз ва баяр-шубариз аьхю кюмек ву. Гъит, ихь шаир Гюльбика Уьмаровайиз гележегдиъ ухьуз хъанара шиърар дикIуз аьхю кьувват туври», – дупну, мектебдин директори баяр-шубар шаирин уьмрихъди таниш гъапIнийи.
Мектебдиъ урхурайи баяр-шубари, шаириз бахш дапIнайи шиърар аьхю аьшкьниинди гъурхнийи. Мяракайиъ иштирак шулайи бицIидари шаирихъ жюрбежюр суаларра хъирчнийи, хъа мялимари табасаран шаирин адресназ ва дугъан яратмишарин гьякьнаан хайлин ужудар гафар гъапнийи.
