Ватандин Аьхю дявдин Гъалибвалин 75 йисандин юбилейихьна республикайин вари муниципалитетариъ жанлуди гьязур шула. Гъирагъдиъ Хив районра гъубзнадар – райондин администрацияйин глава Ярмет Ярметовдин гюзчиваликкди мушваъра жюрбежюр гьязурлугъ’валар гъахура.

 

 

 

Дугъу къайд гъапIганси, му жигьатнаан комиссия тешкил дапIну, ляхнин план тартиб дапIна.

– Гъи вари Урусат Аьхю Гъалибвалин 75 йисандин юбилей къайд апIуз гьязур шулайиган, Хив райондиъ саркьан дявдин ветеран чIивиди имдрували ухьу пашман дарапIди гъитрадар. Хъа Ватандин Аьхю дявдин женгариъ иштирак гъахьи, гьадму йисари дявдин далу терефнаъ гъилиху зегьметкешарин гьюрмат, дурарикан вуйи фикрар марцциди уьрхювал гъи ихь даима буржи ву.

Машкврин улихьна вуйи серенжемарикан гъапиш, ляхин пландиз асас вуди гъабхиди. Гъулариъ Ватандин Аьхю дявдин игитарин гьюрматназ тикмиш дапIнайи ядиграр рас апIбаз дикъатлу фикир тувдихьа. Дидланра савайи, Асккан АрхъитI гъулаъ му гъул’ан агьали Альберт Эмирагъаевдин кьувватариинди Ватан душмандихьан гъюбхю вакиларин гьюрматназ саки 18 метр ягълишин айи ядигар (стела) тикмиш апIбан ляхнар кIули гъахура. Дидин аьтрафарра тялукь саягъниинди ккабалгиди.

Къайд апIураза, абйирин гьунарар пакди кIваин уьрхювализ аьхю мяна а, фицики думу ихь уьлкейин тарих ву. Бахтлу гележег ижми тарихдиин биналамиш шули аьдат ву. Гьаддиз артмиш шулайи наслариз абйирин ватанперверваликан, рюгьлувалин кьувватлуваликан мялуматар тувувал чарасуз лазим ву, – гъапну Ярмет Аьлиметовди.

Шиклиъ: АрхъитI гъулаъ ядигарин тикилиш.