2020-пи йислан ккебгъну, 2019-пи ва гьаддихъан мина вуйи йисари девлет-хазнайихъанди тувну ккуни налогдин кьадар гьисаб апIруган, пенсияйиз гъягъюз 5 йис ккимбу республикайин агьалйириз жилилан, транспортдилан ва девлет-хазнайилан туврайи налогдиз льготйир улупна.
Федералин налогарин гъуллугънан РД-йиъ айи управле-ниейин девлет-хазнайиин налог иливурайи отделин аьхюрин заместитель Ильяс Мазанаевдин гафариинди, туврайи льгота 50 кв. метртIан артухъ йишв адру саб квартирайиина ясана саб хул’ина, вая фицибкIа ляхин апIру йишв’ина ва машин апIру гараждиина туврайиб ву.
Улупнайи жергейик кахьрайи касариз 150-кьан гьяйвнин кьувват айи бицIи машинарилан ва мотоциклйирилан туврайи налогдинра льгота а.
Гьацира пенсияйиз гьягъюз 5 йис ккимбу республикайин агьалйириз кадастрин кьимат улупнайи 600 кв. метрин жилилан туврайи налогдин пул кьяляхъ ктабгъузра мумкинвал шула.
