Наврузбег Керимов
Украинайиъ хусуси метлеб айи дявдин операция ккебгъну, шубуд йисандин арайиъ думу операцияйиъ иштирак шулайи эскрарин хизанарин абйир-бабарин, чвйир-чйирин, уьмриъ фукьан вушра нивкIсуз йишвар, учIвру хажалатар, гъалаб кайи дакьикьйир гъахьну. Мажбур вуди эскервалин гъуллугъ тамам апIурайидариси, душваъ, дявдиъ гъагъи зийинар гъахьидариз кюмек апIури, кьушмарин аьзарханайиъ йигъ-йишв дарпиди операцияйин столихъ ликри дугъужвнайи духтрари гележегдин гъалибвалик аьхю пай кивра.
Гьадрарикан сар, Табасаран райондин Хюряхъ гъул`ан вуйи Ревшан Сейидягьмадов (шиклиъ) ву. Думу гьеле бицIидимиди рягьимлу юкIв айир ва хизандиъ фуж кетIерццишра, дугъан гъаразнаъ шлур вуйи. Мектебдиъ урхури имидитIан дугъу военный хируг хьуз кьаст гъапIнийи.
Мектеб ккудубкIу Ревшан, абайин ва бабан кюмек дарди Дагъустандин гьюкуматдин академияйиъ учIвру. 2001-пи йисан урхуб ккудубкIну, гьадму йисан хирургияйин отделениейиъ интернатурайиъра учIвру. 2004-пи йисан армияйиз гъягъюру. Гьаддихъан, Ревшан Сейидягьмадов Новочеркасск шагьриъ ерлешмиш дубхьнайи кьушмарин аьзарханайиъ уларин уьзрарин отделениейин начальникди ляхниз кьабул апIуру. ЦIиб вахтна душваъ ляхин дапIну, Ревшанди кьаст дапIнайи военный хирургдин пише гъадабгъуз бина ккивру – 2011-пи йисан Санкт-Петербургдиъ С.М. Кировдин ччвурнахъ хъайи эскервалинна медицинайин академияйиъ ординатурайик кучIвру. Урхувалин кьяляхъ Екатеринбург шагьриъ 354-пи округдин кьушмарин госпиталиъ аьхюну хирургди лихуз хъюгъру.
2022-пи йисан февралихъанмина Ревшан, хусуси метлеб айи дявдин операцияйиъ иштирак шулайи эскрарихъди сабси шубуд йисанкьан жюрбежюр аьзарханйириъ хирургди лихура. Ав, мугъан пише думукьан рягьятуб дар, Дугъхьан узухъди телефондиан аьлакьайиз удучIвузкьан гъабхьундайи. Сакьюдар гафар телеграмдиз гъидикIну. Ревшан Сейидягьмадовдин аьхюну чи, Дагъустанбика Сефербеговна Дербент шагьриъ яшамиш шула, ва, дугъахъди аьлакьайиз удучIвну, Ревшандикан саб бицIиди вушра мялуматар гъадагъунза. Мицисдар дирбаш баярикан вуйи макьала аьхюб ва бицIиб шлуб дар, ухьу дурарикан дупнура ва дурарстар игитар, ухьуз айивал улупнура ккунду.
– «Йиз чвуччву зигурайи зегьмет дугъаз ва дугъан хизандиз ужи аьгъя», – гъапну Дагъустанбикайи. Шубуд йискьан вуйич Ревшандиз ккилигури. Сарун чIяаьн ву, саб-кьюб вазлизкьан отпускназ гъач кIури шулча, амма думу чан гафналан алдауз шулдар. «Гьеле душваъ сар каскьан иццрур амиди, узу гъюрур дарза. Узу эскервалинна медицинайин академияйиз гъягъруган, йиз гележегнан пише фициб вуш, фикир дапIну гъушур вуза», – жаваб тувну чвуччву учуз.
Украинайиз гъягъяйиз улихьна хайлин вахтна Ревшан Чечендиъ, Сирияйиъ гъахьну. Дугъан вари уьмур кьушмарин аьзарханайиъ гъябгъюра. Думу учв гизаф жавабдарвал кайир ву. Вари терефарихъанди дюзир, гъапиб кIучIал дарди апIуз ккунир ву. Нагагь эскер, аьзарханайиъ кюмек дархьиди, жара больницйириз гъухиш, аьзарлуйин жавабдарвал кади шулу, телефондиан гьерхну вушра, дугъан гъайгъушнаъ шулу.
Ревшандин уьмрин юлдаш Залинайиз, дугъан сабурназ аьхю вуйи чухсагъул пуз ккундузуз, Ревшандихьан, чан хизандин кюмек дайиш, дици ляхин апIуз хьибдайи. Ревшандиз кьюр риш айич – Аида ва Марина. Аьхюну риш Аида Уралиъ ерлешмиш дубхьнайи медицинайин университетдиъ 4-пи курснаъ сагъламвалин факультетдиъ урхура, хъа Марина гьелелиг 4-пи классдиз гъягъюра.
Йиз чвуччвуз тувнайи медаларикан ва граммотйирикан думукьан мялуматвал адарзуз. Багарихьди саб вазлиз гъидиза кIури гаф тувна. Аьхиримжи ражну гъафири, ихь аьзарлу эскрари учуз «лизи халат али малайикар» кIурачуз, гъапну. Дугъриданра, дурар эскрарин уьмрар уьрхюрайи маликар ву», – натижа гъивнийи Дагъустанбикайи.
