Мейлан Нежефов

Гьаму йигъари Хив райондин Хив гъулан ерлешмиш дубхьнайи спортдин дараматдиъ Ватандин Аьхю Гъалибвалин 80 йис хьпаз бахш дапIнайи «Гъалибвалин насил» зигьим артмиш апIру тамашайин аьхиримжи этап гъабхьну. Му талитар Ватан уьбхрюдарин йисан пландиз тялукь вуди, дидин дахилнаъди гъубхуб вуйи.

 

Зигьим артмиш апIру талитар Дагъустандин глава Сергей Меликовдин табшуругъниинди, жигьилариз ва аргъаж шулайи наслиз ватанпервервалин тербия тувбан циркил мюгькам ва кьувватлу, Урусатдин тарихдиан аьгъювалар гужал апIуб метлеб ади тешкил гъапIну. Дупну ккундуки, му талитариъ урхурайидарин ватандаш позиция мюгькам, ватанпервервалин ва ватанпересвалин тербияйин гьиссар гужал апIбаъ, тарихи гьядисйир аьгъю апIбаъ важиблу роль гъабхура. Талитари мектебариъ урхурайидариз чпин аьгъювалар улупуз, жарадарин тажрубайихъди таниш хьуз ва артухъ мялуматар гъадагъуз ужудар мумкинвалар тувну.

Республикайин викторинайиъ Хив райондин 11 команда иштирак гъахьну.

Талитарин шубуб этапарин натижайиъ нубатнан этапдиз варитIан гизаф баллар гъадагъу командйир удучIвиди ва дурари республикайин этапдиъ чпин муниципалитетдин тереф уьбхиди.