Гюльнара Мягьямедова

10-пи июнди Дагъустан Республикайин прокуратурайиъ къанун уьбхру органарин гъуллугъчйири компьютерарин кюмекниинди апIурайи тахсиркарвалар (киберпреступность) ашкар апIбан ва дурар арайиан адагъбан ляхнин аьгьвалатнан месэлйир гьял гъапIну.

 

Региондин къанун уьбхру органарин кIулиъ айидарихъди вуйи координационный совещание РД-йин прокурор Виктор Эппдин жягьтлувалиинди кIули гъубшнийи. Серенжемди къайд гъапIганси, аьхиримжи йисари компьютерарин кюмекниинди апIурайи тахсиркарвалари агьалйирик гизаф гучI кипра. Гьаддиз думу жюре тахсиркарваларихъди женг гъабхуб республикайин къанун уьбхру органарин ляхнин асас паярикан саб ву.
Гюзчивал гъабхурайи органдин улупбариинди, Дагъустандиъ мялуматаринна коммуникацйирин технологйир ишлетмиш апIури, кIулиз адагъу тахсиркарваларин кьадар бицIиб дар. 2025-пи йисандин 4 вазлин арайиъ гьадму жюрейин 855 тахсиркарвал гьисабназ гъадагъна.
Компьютерин кюмекниинди гъахурайи тахсиркарвалар жиниди гъитуз рягьятди ву. Гьаму йисан прокурорари гьадму цирклиъ гьисаб апIбахьан жин дапIнайи 94 тахсиркарвал ашкар гъапIну.

Виктор Эппди, мялуматаринна коммуникацияйин технологйирин цирклиъ апIурайи тахсиркарваларихъди женг гъабхбан ляхнин ужуб натижа хьпан бадали, къанун уьбхру идарйирин арайиъ сигъ алакьа уьбхюри ляхин апIбан важиблуваликан гъапнийи.
Региондин прокурори, къанунсузди пулар жин дапIнайи касар суддиз тувбан бадали ва зарар гъабхьи касарин пулин дакьатар кьяляхъ апIбан бадали, дурари аьрзйир гьязур апIруган, прокурорари кюмек дапIну ккуниваликан гъапнийи. Гьаму йисан эвелианмина прокурорари судариз 20-дилан зиина аьрзйир хъадаъна.

Координационный совещаниейиъ гьял гъапIу месэлйирин гьякьнаан къарар кьабул гъапIну.