Наргиз Гюлечова
Гьаму йигъари Ставрополь крайин Минеральные Воды шагьриъ «Урусатдин багълар – 2025» варихалкьарин арайиъ вуйи XII форум кIули гъубшну. Выставка асас вуди йимишарин циркил армиш апIбаъ цIийи технологйир ишлетмиш апIбаз ва уч гъапIу бегьер уьбхбаз бахш дапIнайиб вуйи.
Серенжемдиз, Урусатдин регионарианси, багарихь хьайи харижи гьюкуматарианра хайлин багъманчйир, илимдин вакилар ва экспертар дуфнайи. Гьадму гьисабнаъди ихь региондианра РД-йин гъулан мяишатдин ва ипIру-убхъру сурсатарин министрин сарпи заместитель Шарип Шарипов ва Дагъустандин багъманчйирин союздин председатель Сайдулла Орусханов кIудиъ ади, республикайин районарин гъулан мяишатдин управленйирин начальникар ва кIакIначи мяишатарин пишекрарра кади, 50-тIан артухъ кас иштирак гъахьнийи.
Гъи регионариъ багъманчивал артмиш апIбаз федеральный гьюкмарин терефнаан хайлин кюмек тувра. Мяишатарин эйсйири чпин удучIву харжар ккеркбаз кюмек вуди, субсидйир гъадагъура. Мидин гьякьнаан Шарип Шариповди гъапиганси, гьаму жюрейин форумар гъахбиинди, цирклиъ лихурайидариз алахьурайи читинвалар гьял апIбан рякъяр агуз мумкинвалар шула ва федеральный гьюкмарин терефнаан цирклиз фикир туврайиб рябкъюра.
Аьхиримжи вахтари Дагъустандиъ киврайи йимишарин багъларин кьадар гьар йисан артухъ шула. Гьамусяаьт республикайиъ 30 агъзур гектариъ багъар итна. Гьадрарикан 23 агъзур гектариан бегьер гъадабгъура. Гьаддихъди сабси, гизаф йимишарин бегьер тувру багъарра артухъ апIура, ва дурарин кьадар 4700 гектар дубхьна. Гъадабгъурайи йимишарин бегьернан кьадарра артухъ шула. Мисал вуди гъадабгъиш, ккудубшу йисан республикайиъ 260 агъзур тоннайин йимишар уч гъапIну. Му кьадар 2020-пи йисахь тевиган, саки кьюб ражари артухъ дубхьна. Хъа цци кIуруш, хъана артухъ бегьер гъадабгъуз планариъ а.
«Йимишарин циркил артмиш апIбан бадали, иллагьки гилар айи йимишар гьясил апIуз, Дагъустандиъ фукьан вушра мумкинвалар а. Ккудубшу йисан республикайиъ 93 агъзур тоннайин гилар айи йимишарин бегьер уч апIбиинди ухьу Урусатдин кIакIначи регион гъабхьну.
Аьхиримжи йисари багъманчйири, гилар айи йимишарин багъар артухъ ва дурар артмиш апIбан бадали, гизаф фикир тувра. Магьан гьаму форумдиъ иштирак хьуб’инди, харижи уьлкйириъ ишлетмиш апIурайи тажруба ухьухьра ишлетмиш апIбан бадали, гьадрарихъди таниш хьуз ва Дагъустандиан дуфнайи делегацияйиз кIакIначи багъманчивалин мяишатарихъди аьлакьйир йитIуз мумкинвал шула», – аьлава гъапIну Шарип Шариповди.
