Гюльнара Мягьямедова

Дагъустандин Огни шагьрин глава Замир Гьяжимурадов улихьна йигъари хусуси метлеб айи дявдин операция гъабхурайи йишваъ ерлемиш дубхьнайи гвардияйин жаради вуйи мотострелковый 136-пи бригадайиз рягьимлувалин кюмек хьади гъушну. Дидин гьякьнаан муниципалитетдин мялуматарин гъуллугъну хабар тувра.

 

Замир Гьяжимурадовди хусуси метлеб айи дявдин операцияйиъ иштирак шулайи эскрариз гъубху рягьимлувалин кюмекнан дахилнаъ телевизорар, мотоциклйир ва дурариз лазим шлу жара техника айи. Мэрин гафариинди, республикайин Глава Сергей Меликовдин кюмекниинди ва Дагъустандин Огни шагьрин предпринимателарин жумартвалиинди гьадму жюре кюмек тувуз мумкинвал гъабхьну.
Бригада ерлемиш дубхьнайи йишв’ан кюмек тувдарихьинди илтIикIну, Замир Гьяжимурадовди эскрарин терефнаан дурариз чухсагъул гъапнийи.

Рягьимлувалин кюмек тувбалан савайи, Дагъустандиан вуйи ихь эскрариз артухъ фикир туври, шагьрин мэр бригадайин командованиейихъди ва эскрарихъди гюрюшмиш гъахьну. Дугъу, дявдин месэлйир хъуркьувалиинди тамам апIуб ва шлубкьан ухди гъалибвалра хьади хулариз кьяляхъ гъюб ккун апIури, лишанлу гъахьи эскрариз чухсагъул мялум апIру кагъзар тувну.
Хусуси метлеб айи дявдин операция гъабхурайи йишваз душну имиди, Замир Гьяжимурадов кьушмарин «Белгород» дестейин командующий, Урусатдин Игит, генерал-лейтенант Эседулла Абачевдихъдира гюрюшмиш гъахьну. Урусатдин Игитри, дявдин гъуллугънаъ айидариз кюмек апIбаз дилигну, Дагъустандин Огни шагьрин агьалйириз чухсагъул мялум гъапIнийи.
Хусуси метлеб айи дявдин операция гъабхурайи йишваъ Замир Гьяжимурадов Урусатдин оборонайин министерствойин дявдинна политикайин кIулин идарайин начальникдин заместитель, «Ахмат» спецназдин командир, Урусатдин Игит Апти Алаудиновдихъдира гюрюшмиш гъахьну. Генерал-лейтенантди хусуси метлеб айи дявдин операцияйиъ иштирак шулайи эскрариз кюмек туврайивализ дилигну, Дагъустандин Огни шагьрин кIулиъ айириз чухсагъул мялум гъапIну.