Мейлан Нежефов

Гьаму йигъари Хив райондин культурайин отделин вакилар райондин ЦIийи Фригъ гъулан мектебдин бинайиин ачмиш дапIнайи йигъандин лагериъ айи баяр-шубариин улукьуз гъушну.

 

Делегацияйин кIулиъ айи Хив райондин культурайин отделиз регьбервал туврайи Казбек Къазиевди ич сюгьбатнаъ къайд гъапIганси, бицIидарихъди гюрюшмиш хьувал дурари йигъар ккимиди планарик кипнайиб вуйи. Лагериъ айи бицIидариз му серенжем ва ватандикан, тарихдикан, игит эскрарикан вуйи сюгьбатар лапра кьабул гъахьнийи.

«Лагериз, ЦIийи Фригъ гъул’анси, Хив райондин жара гъуларианра 100-дихьна бицIидар гъюра. Учу гъюрайибдикан хабар гъабхьи бицIидари мектебдин гьяятдиъ асфальтдиин рангнан меларихьди кабалгнайи майдан гъизигну. Учу дурарихъди ватанпервервалин, рякъяриъ ва нирарин гъирагъарихъ хатIасузвал уьбхювалин темйириан, дагълуйирин, хъа асас вуди табасаран ва лезги халкьдин аьдатарикан, тарихдикан, милли халкьарин дустваликан сюгьбатар кIули гъухунча. Гюрюшдин кьюбпи пайнаъ лагериъ айидар, дестйириз жара дапIну, дурарин арайиъ спортдин талитар гъухунча. Хъа учухъди дестейиъ айи Хив райондин РКДЦ-йин солист Адият Гьямзаевайи чан мяъли ккебгъубси, вари баяр-шубар майдандиина ялхъвниз удучIву.

Пуз ккундузузки, ихь аргъаж шулайи насил закур варибдихьна вижнасузуб дархьуз, ухьу бицIидариз шадвал хуз, дурар рази ктауз, аьхюр-бицIириз гьюрмат ади хьуз, ужуб ва харжиб улупуз гъи чалашмиш духьну ккунду. БицIидарихъди вуйи сюгьбатар наан гъахурушра, дурар саб фициб вуш сюгьриндарстар шулу. Гъит, ихь веледар гьаммишан разиди ва шадди гъузри», – гъапнийи Казбек Къазиевди.