Гюльнара Мягьямедова

Гъулан мяишатдин мянфяаьтлувал за апIбан бадали, Дагъустандин фермерариз гъийин деврин цIийи технологйирихъди таниш хьуз мумкинвалар тувра. Гьаму гъюрайи августдин вазлихъан хъюгъну, региондиъ дурзнайи чюллер гюзчиваликк уьрхюз, дудургнайи малар агуз дронар ишлетмиш апIбан яркьу программа гьярактнак кипди.

 

Дагъустандин гьюкуматдин университетди уьмриз кечирмиш апIурайи «Илим хьади гъулариз!» проектди республикайин жюрбежюр районариъ ляхин гъабхуз мобильный 15 лаборатория лихуз хъюгъди.
Гьадму саб йишвлан тмунуб йишв’ина гъахру лабораторйириъ юкIв хъайидарихьан 3D-моделирование ва биотехнологйир аьгъю апIуз мумкинвал хьибди.
Гъулан мяишатдин министерствойиъ къайд гъапIганси, Къизилюрт райондин Комсомольское кIуру гъулаъ мектебдиъ урхурайидариз ерли чюллериъ квадрокоптерарихъди ляхин апIуз улупуз хъюгъна.

Дагъустандин гьюкуматдин технический университетди С.П. Королевдин ччвурнахъ хъайи Самарайин университетдихъди сатIиди, «Пилот адарди тIирхру аппаратариз кадрйир» кIул тувнайи федеральный проект уьмриз кечирмиш апIура. Думу гьюкуматдин «РФ-дин илимдинна техникайин артмиш’вал» программайин дахилнаъди Росрыболовствойиз вуйи авиацияйин гъурулушариз операторар гьязур апIбан федеральный проект ву.

Пилот адарди тIирхру аппаратар хъауз улупурайидарин практика Дагъустандин гьюкуматдин технический университетдин аьлава образованиейин ва пишекарвал тувбан факультетдиъ гъахура. Дурариз аэрофотосъемкйир апIуз, дронариан объектар тяйин апIуз ва нирариин, даграриин, гьюлериин ахтармишар гъахуз улупура.
Урхурайидариз балугъарин мяишатдин факультетдин мялимари ва РД-йин жиларин ва мал-мутмуйин аьлакьйирин министерствойин пишекрари дарсар кивра. Дронар тIирхуз деетбан ляхин ДГТУ-йин Военный урхбан центрин бинайиин гъабхуру. Урхурайидарин арайиъ Дагъустан, Чечен, Кабардино-Балкария, Кафари Осетия ва Ингушетия республикйириан Росрыболовствойин пишекрар а.
Курсар ккудукIган, аьгъювалар гъадагъдарин, теорияйин ва практикайин натижйириз лигну, натижйир йивбан аттестация кIули гъабхиди.