Зубайдат Шябанова

Гьаму йигъари Хючна гъулаъ Кьалухъ Мирзайин спортдин дараматдиъ Дагъустандин кьибла терефнан районарин арайиъ волейболиан талитар кIули гъушну.

 

Ич сюгьбатнаъ Табасаран райондин волейболиан сборный командайин тренер, райондин бицIидаринна живанарин спортдин мектебдин директор Садикь Уьсмановди къайд гъапIганси, думу талитар Табасаран райондин администрацияйи Дагъустан республикайин волейболин федерацияйин табшуругъниинди тешкил гъапIдар ву.

«Талитариъ Табасаран райондин, Дагъустандин Огни шагьрин, Дакъузпара райондин командйир иштирак гъахьну.
Пуз ккундузузки, ихь райондин кьюбиб командйириъ Къужникан, Хьаргъян, Жвул’ан, Ругжан, Хюрккан, ТинтIан, Хючнаан ва жара гъулариан волейбол бажаранлуди ва ужуб аьшкь ади уйнамиш апIру спортсменар а. Турнириъ иштирак шулайи вари командйири сар-сарихъди талитар гъухнийи. ВаритIан маракьлу талит Табасаран райондин асас ва жигьил командйирин арайиъ гъабхьну. ИкибаштIан, тажруба айи спортсменар улихь удучIвну.
Турнирин вари талитарин натижйириинди, гъалибвал Табасаран райондин сборныйин асас командайи гъадабгъну. Кьюбпи йишв’ина Табасаран райондин жигьиларин команда удубчIвну, хъа шубубпи йишван сагьиб Дакъузпара райондин волейболистарин сборный гъабхьну», – гъапнийи Садикь Уьсмановди.

Кьибла районарин волейболин чемпионатдиъ гъалибвал гъадабгъу команда 5-7-пи августди Хунзах райондиъ кIули гъябгъру Дагъустандин чемпионатдиз гьязур шула. Ихь командайиз гьаду-шваъра хъуркьувалар ккун апIурхьа. Думу талитарин натижйирихъдира учву таниш апIидича.