Зубайдат Шябанова

Дагъустан Республикайин Конституцияйин йигъаз бахт вуди Табасаран райондиъ тешкил апIру ва гъахру серенжемарин оргкомитетдин заседаниейиъ мялумат тувганси, багарихьди райондиъ бицIидариз ва живанариз «Ритм» кIуру центр ачмиш апIиди.

 

Табасаран райондин глава Мягьямед Къурбановди къайд гъапIганси, думу центр «Урусатдин живанар» кIуру важиблу программайин дахилнаъди райондиъ жигьиларин игьтияжар гьуркIру центрин бинайиин алди 26-пи июли ачмиш апIбанди ву. Центр Урусатдин Президентдин бицIидарин месэлйир гьял апIбаан вари ихтиярар тувнайи вакил Мария Львова-Беловайин жягьтлувалиинди ва РД-йин глава Сергей Меликовдин кюмекниинди ачмиш апIурайиб ву.

Муниципалитетдин кIулиъ айири гъапиганси, думу центрин цIийи майданди аргъаж шулайи наслиз гьаму деврин цIийи шартIариъ жвув вердиш хьуз вари терефарихъан кюмек тувди.
Центриъ бицIидари ва живанари чпин яратмиш’валин мумкинвалар ачмиш апIуз, хайирлу тажруба гъадабгъуз, чпин фикрар ачухъ апIуз дубгъиди.
Центр ачмиш апIбан шадлугънан серенжемариъ иштирак хьуз Табасаран райондиз Дагъустан Республикайи бицIидарин месэлйир гьял апIбаан вари ихтиярар тувнайи вакил Марина Ежова ва РД-йин жигьиларин ляхнариз лигру министр Камил Саидов гъюбанди ву.