Гюльнара Мягьямедова

26-пи июли Мягьячгъалайиъ айи Поэзияйин театри чан 10 йисандин юбилей къайд гъапIну. Театр 2015-пи йисан ачмиш гъапIуб ву. РД-йин культурайин министерствойиан туврайи мялуматариинди, сабдизкьан ухшар дару, варидарихьан тафавутлу театр абццуб халкьдин шаир Расул Гьямзатовдин кIван метлеб вуди гъабхьну. Дагъустандин кIулиъ ади гъахьи Рамазан Аьбдулатиповдин тешкиллувалиинди арайиз гъабхи Поэзияйин театр чан багахь Дагъустандин яратмиш апIбарин ужударсдар кьувватар сатIи гъапIу республикайин жямяаьтлугъ ва культурайин уткан дарамат гъабхьну. Гъира кмиди думу Кафари Кавказдиъ ва Урусатдиъ айина адру тек саб поэзияйин театр ву. ЙицIуд йисандин арайиъ душваъ театрарин, поэзияйин, музыкайин варжариинди проектар, семинарар, поэзияйин конкурсар ва фестивалар кIули гъушну.

Поэзияйин театрин сабпи юбилейдиз бахш вуйи серенжемдиъ РД-йин культурайин министр Зарема Бутаева, РФ-дин халкьдин артист Айгум Айгумов, РД-йин халкьдин шаир Марина Аьгьмадова-Колюбакина, «Дагъустандин дишагьли» журналин кIулин редактор Хамис Шамилова ва театрин жара дустар иштирак гъахьнийи.