Мейлан Нежефов
Аьхиримжи йисари дагълу гъулариз, душваъ яшамиш шулайи агьалйирин тIалабар гьуркIбаз артухъдиси фикир тувуз хъюгъна. Дици хьувал гьюкуматдин терефнаан гъуларин яшайиш ужи апIбан метлеб ади гьяракатнаъ ирчнайи программйирихъди ва проектарихъди аьлакьалу ву. Дидланра савайи, республикайиз аьхиримжи йисари гизаф кьадарнаъди туристар гъюра, ва ерли гьюкмари дурариз гъулай шараитар яратмиш апIуз чарйир агура, гьаз гъапиш туристари ерли бюджетдиз гъазанжар хура.
Хив райондин Гъвандикк гъулан советдиз дахил шулайи гъулариъ аьхиримжи вахтна фицдар дигиш’валар духьнаш, узуз му гъулан советдин глава Сарухан Мягьямадхановди ктибтну.
– Сарухан Мягьямадханович, ичв администрацияйик швнуб гъул кахьра? Думу гъуларин жилариин шнуб тешкилат ляхник ка?
– Гъвандккарин администрацияйик Гъвандикк, ЦIудихъ, Арчугъ ва ихь кутанарин аьтрафариин али Сюгют гъулар кахьра. Гьюкуматдин тешкилатарикан улхуруш, Гъвандккарин гъулаъ мектеб, бицIидарин багъ, ФАП, гъулан библиотека, культурайин хал а; гьаци ЦIудихъра мектеб, культурайин хал, ФАП а. Сюгютдиъ кIуруш, мектеб, ФАП, культурайин хал, Арчугъра ккебгъбан мектеб а.
– Думу идарйириъ лихурайидарин кьадар фукьан ву?
– Администрацияйиъ юкьур кас ача: глава, главайин заместитель, бухгалтер ва марццишназ лигурайир. Культурайин хулаъ шубур пишекар а, библиотекайиъ – сар пишекар. Гьацира, бицIидарин багъдиъ йирхьур-ургур касди ляхин апIура.
– Гьюкуматдин ляхнихь дару имбу агьалйир фтиин машгъул ву? Дурари мадар фици апIура?
– Гъулаъ яшамиш шулайи агьалйирин мадар, гизафси, мал-къара, пеъ-шюхъ, марчч-мал уьбхюри, хутIлариъ ляхин апIури, картфар, келемар киври, шула, саспидари дурар масу тувуз битмиш апIура. Гьацира, багълар итнайидарра а. Гъвандккарин поселениейиан 100-дилан зиина касар хусуси метлеб айи дявдин операцияйиъ иштирак шула. Украинайиъ гъягъюрайи женгариъ иштирак духьну, гъийихдарра а. Мектебарин цалариъ, думу игитар кIваинди гъитбан бадали, мармардашдин гъванар итна
– Рякъярин, марццишин уьбхбан ва агьалйир штухъди тямин апIбан месэлйир фици гьял апIурачва?
– Гъуларин марццишнакан улхуруш, узу главайин вазифйир кIули гъахуз хъюгъюбси, му чарасуз гьял дапIну ккуни месэлайиз артухъди фикир туври, агьалйирихъди мясляаьт дапIну, гьар вазли кьюб ражари КамАЗ-диъди вари чIюрхюб-чIуруб Дербент райондиъ айи зирзибил дабхьру йишваз гъабхурача.
Вари герек вуйи кагъзарра гьязур дапIну, саб километр рякъ’ин асфальт улубзунча. Цци, райондин администрацияйинна кюмек дубхьну, саб километрна 300 метрсан рякъ’инра асфальт улубзуз мумкинвал гъабхьунчуз. Штун месэлара дици писди дарчухь. Гъулан зиихъ майдандиин «Марцци шид» кIуру программайиинди дубхнайи штун варж-варж куб айи кьюб аьхю цистернйир дивунча.
– Сарухан Мягьямадханович, аьхиримжи шубуд йисандин арайиъ ичв поселениейиъ фицдар важиблу дигиш’валар духьна?
– Администрацияйин идара рас гъапIунча, сач Гъвандикк гъулаъ ФАП ва футболин бицIи майдан дивунча. Саб гафниинди, учхьан удукьруб кIулиз адабгъуз чарйир агурача.
– Хусуси метлеб айи дявдин операцияйиъ жюрэтлувалиинди иштирак шулайи кьягьялариз ва дурарин хизанариз фициб кюмек апIурачва?
– Аьхиримжи йисари дявдин женгариъ иштирак шулайи ихь жигьилариз ва дурарин хизанариз кюмекар апIури, думу хизанарикан мялуматар гьязур апIурача, дурарихъди гюрюшмиш шули, дурарин игьтияжар гьуркIбаз фикир туврача, дурарин яшайишдин месэлйир гьял апIурача. Улихьнаси, сар-кьюр кас, жил ккундучуз кIури, илтIикIнийи, думу месэлара гьял апIуз хъюгънача. Магьа, жикъиди кIуруш, Гъвандикк гъулан администрацияйин гъайгъушнар гьамцдар ву.
– Сарухан Мягьямадханович, интервью тувбаз чухсагъул!
