Гюльнара Мягьямедова
27-пи октябри Табасаран райондин Хючна гъулан сабпи нумрайин лицейиъ «Математикайин мялимарин пишекарвалин аьгъювалар за апIуб» темайиан республикайин математикайин мялимарин слет кIули гъубшну.
Серенжем Табасаран райондин администрацияйин ва образованиейин управлениейин кюмекниинди Дагъустан Республика-йин мялимарин ассоциацияйи тешкил дапIнайиб вуйи. Слетдиъ республикайин 19 райондиан математикайин 150 ужударсдар мялимар, Мялимарин ассоциацияйин вакилар, образованиейин управлениейин гъуллугъчйир иштирак гъахьнийи.
Уч духьнайидарихьна тебрикнан гаф хьади Табасаран райондин главайин ччвурнахъан дугъан заместитель Заур Мусаев илтIикIнийи.
«Образованиейин гъурулушдин ери за апIуб ихь асас месэлйирикан саб ву. Гьаму гъи ачмиш апIурайи слетди республикайин ужударсдар математикар сатIи дапIна. Ихь мектебариъ урхурайидариз математикайин илим кьабулди ву, дидин гьякьнаан гьар йисан Табасаран райондиъ гъабхурайи МГУ-йин профессор З.Юзбеговдин ччвурнахъ хъайи олимпиадайи шагьидвал апIура. Олимпиадайин гъалибчйир шубуд йигъазди экскурсияйиз Москвайиз гъягъюра.
Слетдин иштиракчйириз мянфяаьтлу ляхин ккун апIураза ва, слетдиъ гъадабгъу тажруба ишлетмиш апIури, ичв ученикари ужудар натижйир ади ОГЭ ва ЕГЭ тувур кIури, умуд кивраза», – гъапнийи дугъу.
Серенжемдиъ гьацира РД-йин математикайин мялимарин ассоциацияйин председатель, Мягьячгъала шагьрин 8-пи лицейин директорин заместитель Салидат Караевара удучIвну гъулхнийи. Дугъу слетдин метлебнакан ва улихь дийигънайи месэлйирикан гъапнийи, РД-йин математикайин мялимарин ассоциацияйин ляхникан, мектебариъ математикайин дарсар киврайи мялимариз алахьурайи читинваларикан ва дурар гьял апIбан рякъярикан ктибтнийи.
Салидат Караевайи серенжемдин иштиракчйириз, асас вуди ярхла районариан дуфнайи мялимариз чухсагъул дупну, 2026-пи йисан Мягьячгъалайиъ мялимарин теклифарин фестиваль гъабхбанди вуйиваликан мялумат тувнийи. Гьюкуматдин натижалу имтигьяндин 2025-пи йисаз улихьна вуйи 3 йисандин натижйирикан Мягьячгъала шагьрин 39-пи лицейин математикайин мялим, Урусатдин математикайин мялимарин ассоциацияйиъ Дагъустандин вакил Зумруд Аьбдурягьмановайи ктибтнийи. Аьбурягьмановайи, урхурайидари деетурайи гъалатIар гьисабназ гъадагъури, математикайин дарсар кивбан методика къайдайиз хпан теклифар дивнийи.
Слетдин ляхин 4 секцияйиъ давам гъабхьнийи. Ужуб тажруба айи мялимари мастер-классар, тренингар, жюрбежюр темйириан математикайин дарсар улупнийи, олимпиадйириз гьязур хьувалин, месэлйир гьял апIбан методикйирихъди таниш гъапIнийи.
Серенжемдин натижйир йивури, слетдин тешкилатчйири вари иштиракчйириз сертификатар, математикайин дарснан слет тешкил апIбаъ ва гъабхбаъ кюмек тувбаз РД-йин мялимарин ассоциацияйин президент Анжела Байрамбеговайин терефнаан чухсагъул мялум апIурайи кагъзар тувнийи
