Наргиз Гюлечова
Табасаран райондин Халагъ-Гуми тереф Хив райондихъди сатIи апIурайи рякъ саки гьар йисан рас апIури шулу. 2023-пи йисанра кьюбрид районарин гъунши гъуларин агьалйирин кюмекниинди думу рякъ’ин расвалин ляхнар кIули гъухнийи. Аммаки, мархьар, селлер ургъуб себеб дубхьну, рякъ лап пис гьялназ гъафну. Шид гизаф гъабхьи Рубас нири кьюб райондин арайиъ айи гъядра чIур гъапIну.
Рякъ фукьан рас хъапIишра, мархьари думу, гьяйифки, гъибтурдар. 2023-пи йисанси, ццира жягьтлувал улупури, му жямяаьтлугъ ляхнин, улихь гьучIвнайир Ляхла гъулан агьали Ферудин Маллаев ву. Дугъу учуз туву мялуматариинди, му ражари ляхнихъ хъюгъруган, расвалин ляхнар яркьуди тамам апIуз кьаст адайи.
«2023-пи йисанси ццира ич дерейиъ айи баяри саб бицIиди кIекIел алабхьну, му рякъюн саб пай рас апIуз чарйир гъизигунча. ИкибаштIан, му ляхин сарихьанна кьюрихьан апIуз шлуб дар, гьаддиз, магьан цци гьарури, чан хиларигъ гъяйи кепкар тувну, рякъ рас апIбак пай кивуб ккун гъапIнийча. Сад-кьюд йигъандин арайиъ 330 агъзуртIан артухъ пулра уч гъабхьнийи. Мидланра гъайри, чан терефнаан 100 агъзур манатдин кюмек Ляхла гъулан поселениейин администрацияйин терефнаан Хив райондин депутатарин собраниейин депутат Шамсудин Гьяжимурадовдира тувнийи. Уч гъабхьи пулин дакьатарихъ Табасаран райондиан 18 КамАЗ кIекIел дубхну, рякъ’ин алабхьунча. Магьа сарун саб читинвалра адарди бицIи машинарихьан рякъюъди гъягъюз шулу», – ктибтнийи Ферудин Маллаевди.
Му сувабнан ляхник, саб гъунна терефнан агьалйириси, жара йишвариан вуйи касарира – гьам Дагъустандин шагьрариъ яшамиш шулайидари, гьам Урусатдин вари регионарианра вуйидари – пай кивну. Уьмуми гьисабариинди, 150-тIан артухъ касари иштираквал дапIну, 430 агъзур манат уч гъабхьну. Думу ляхниз хусуси метлеб айи дявдин операцияйиъ иштирак шулайи хайлин баярира пулин кюмек тувнийи.
Ккудубшу ражариси, цццира вари дакьатар Ферудин Маллаевдин счетназ уч гъапIнийи.
«Дюзди кIуруш, му ражариси дарди, думуган гизаф техникайизра дих гъапIнийча, фицики апIру ляхин лап кьадарсуз гизаф айи. Гьаддиз гизаф техникара чарасуз лазим гъабхьнийи. Туву пулин дакьатар ктарди, сабсана йигъан гвачIтIан хябяхъдиз чан терефнаан рякъ дюз апIуз кIури, депутатди экскаваторра гьапIнийи. Аьхю чухсагъул чаз гьам йиз, гьам ич дерейин вари жямяаьтдин терефнаан.
Лазим вуйи кьадар пул уч хьпан кьяляхъ, дакьатар уч апIувал хъябкьна кIури, швнудсад йигъари бикIури гъахьунза, амма хайлиндари, чпин терефнаанра кюмек ибшри кIури, кепкер хътауб давам гъапIнийи. Уч гъабхьи пулин дакьатарикан саки 317 агъзур рякъюн расвалин ляхнариз харж гъапIунча ва 12 агъзур манат жюрбежюр лазимшнариз ими. Пулихъ дарди, чпин терефнаан рякъюз кюмек гъапIу касарра хайлиндар гъахьну. Дураризра варидиз чухсагъул кIураза», – аьлава гъапIну Ферудин Маллаевди.
Рякъ рас апIбан ляхниъ удучIву харжарин, уч гъапIу дакьатарин варибдин гьякь-гьисаб, Ферудин Маллаевра кIулиъ ади, тялукь комиссияйи гъабхура.
