Советарин вахтна ЦIийи йис лап гурлуди, яркьуди, шадди къайд апIуйи. Зегьметкеш касари му мшкврахъди ляхнин цIийи хъуркьувалар, бахтлу уьмрин аку хиялар, улубкьурайи йисан ккуни ватан имбубсана гюрчег ва абад шлувалик киврайи умудар аьлакьалу апIури гъахьну. Думугандин инсанарин хиялар советарин вахтна табасаран авторари гъидикIу шиърариъ уччвуди атIагна.

 

М. Митаров
ЦIийи йис мубарак

Гъийин девриъ бахтлу вуйи,
Машквар дубхьнай халкьдиз цIийи,
Вари элин паяр кайи
Шийи йис вардиз мубарак.

Ккебгъну уьмрин шибритI цIийи,
Дарамат диву, мюгькам вуйи,
Бахтлу уьмрин даягъ гъаши
Яшлу касариз йис мубарак.

Удар удруси гашун пеъли,
Гвагвар кахьрай сикин дарди,
Мяъли кIурай накьшар тIаъри,
Устад хпариз йис мубарак.

Я йишв дарпи, ясана йигъ,
Зегьмет зигурай, духьну сигъ,
Кабхьуз гъитрай ихь уьмриз ригъ
Кьягьялариз йис мубарак.

Гагь гализ, гагь гъюри сивиз,
Йиккна никк гьясил гъапIуриз,
Дагълар дюнмиш кюкдин багъдиз,
ГъапIу устйириз йис мубарак.

Гъелемарси таза багъдин,
Дарс дубгъурай цIийи уьмрин,
Зегьмет аьгъю учителин,
Урхру баяриз йис мубарак.

Б. Ражабов
ЦIийи йис

Дуфну хъубкьра ухьуз магьа
Аьжаб мубарак цIийи йис.
ЦIийи бахтар хьади, багьа
Уьмур хурайи цIийи йис.

Халкьдиз туври мажал,
Ислягьвал апIури гужал,
Увуз хушгелди, жан уж’вал
Хъади гъюрайи цIийи йис.

Халкьдин зегьмет апIин кьабул
Туву уьлкейиз хам мал бул.
Ихь ватандин абур, асул
Хъана за апIин, цIийи йис.

Багълар кивру чюл бегьерлу,
Ягъур хъавухъ — вуча бахтлу
Жинснан фермйир яркьу aпIpy
Кьувватар хъачухъ, цIийи йис.

Йирхьудпи хьуд йисан план
Тамам aпIpy женгнан майдан,
Ислягьвалин багьа лишан
Халкьдиз мубарак, цIийи йис.

М. Уьмаров
ЦIийи йис

Салам увуз, йиз кIван салам, ЦIийи йис!
Ча ву вардиз тебрик апIуз ихтияр.
Бахтлуб ибшриву вардариз, анжагъ йиз
КIван симарик кучруган, йихь ихтият.

Гъубшу йису, ккуни бализ дадайи
КIурубси, назукди зуз гъапи:
«БицIир, кюмюр цIиб ву, ханжал апIбан бадали,
Инсан хьпан бадали бабкан хьуб ву цIиб».