Наргиз Гюлечова

21-пи феврали къайд апIурайи Бабан чIаларин йигъахъди аьалакьалу вуди, «Табасаран чIал» телеграм-каналиъ, мектебариъ урхурайи бицIидарин арайиъ табасаран чIалниинди вуйи шиърарин конкурс тешкил дапIна. Душваъ иштирак хьпан бадали, табасаран чIалниинди уччвуди ва марцциди урхурайи шиир асас вуди жвуван Ватандихьна, багъри гъулахьна, бабан чIалнахьна ккунивал улупурайиб дубхьну ккунду.

Конкурсдин сабпи пайнаъ иштиракчйирикан гъалибчйир дурариз дивнайи лайкарин кьадарниинди тяйин апIиди. Аммаки гизаф лайкар гъазанмиш гъапIур гъалиб дархьузра мумкин ву, фицики конкурсдин кьюбпи пайнаъ жюрийи иштиракчйири урхурайи шиърарин ерийизна урхбан марццивализ кьимат тувди. Шиърарин конкурсдиъ иштирак гъахьи баяр-шубарикан 1-пи, 2-пи ва 3-пи йишван сагьибар пулин ва жара пешкешариинди лишанлу апIиди.
Мидланра гъайри, варитIан савадлуди ва гьевесниинди шиир гъурхдаризра пешкешар тувди. Конкурсдиъ иштирак хьуз аьрзйир 10-пи феврализкьан @Tabasaran2026 гьаму ссылкайиинди вая WhatsApp-дин 8 (961) 838-21-04 нумрайиз кьабул апIура.
ХъадапIурайи видеойихъди иштиракчийин фамилияна ччвур, думу наънан вуш, фуну мектебдиъ ва швнубпи классдиъ урхураш, мялуматар улупну ккунду.