Гюльнара Мягьямедова
27-пи январи Дагъустандин глава Сергей Меликовди Республикайин призывдин комиссияйин ва РД-йин гьяракатнан штабдин сатIи вуйи заседание кIули гъубхну.
Душваъ ватандашар эскервалин сифтейин гьисабназ гъадагъбан ва гьацира гьаму йисан январин вазли муниципальный образованйирин призывдин комиссйири гъапIу ляхнин натижйирин месэлйир гьял гъапIну.
Региондин главайи кIваина гъабхиганси, 2026-пи йисан эвелианмина призывдин комиссйирин ляхин ярхи йисди гъабхруси дапIна, хъа военный гъуллугъназ дих дапIнайи ватандашар хьадукран призывди 1-пи апрелилан 15-пи июлизкьан ва чвлин призывди 1-пи октябрилан 31-пи декабризкьан армияйиз гъахури хьибди.
«Ватандашар эскервалин гьисабназ гъадагъбан ляхин вахт ккимиди дубхну ккунду. Призывдин кампанйирин натижа гьаддилан асиллу шула. Эскервалин гьисабназ гъадагъуб йисандин арайиъ 12 вазли давам хьибди», – илтIикIнийи Сергей Меликов военный комиссарарихьна ва муниципальный образованйирин главйирихьна.
Заседаниейиъ къайд гъапIганси, урхурайидарин ва лихурайидарин 17 йис тамам гъабхьиган, эскервалин гьисабнаъ дийигъбан бадали, дурар повесткайиинди военный комиссариатдиз гьауз тешкилатар буржлу ву.
Чпин терефнаан комиссйири ватандашарин сагъламвал ахтармиш дапIну, психологияйин тIалабариз дилигну, дурар военный гъуллугъназ гъадагъуз шлудар вуш, военный гьисабназ гъадагъбан, эгер бедендин сагъвал бегьем дарш, дурар гьисабнаъ гъитбан къарар кьабул дапIну ккунду.
Ватандашар сифтейин военный гьисабнаъ дерккбан ва муниципальный образованйирин призывдин комиссйирин гьякьнаан республикайин военный комиссарин вазифйир тамам апIурайи Гьюсен Уьмаргьяжиевди ктибтнийи. Дугъан гафариинди, муниципальный районарин ва шагьрарин округарин вари комиссйир ватандашар эскервалин гьисабназ гъадагъбан ляхнихъ хъюгъна. Ляхин ерли самоуправлениейин органарихъди сатIиди гъабхура. Му 2009-пи йисан бабкан гъахьидариз ва яшнан думутIан аьхюдариз, эскервалин гьисабнаъ ади ккуни, амма гьисабнаъ адрудариз кайиб ву.
Гъийин йигъаз эскервалин гьисабнаъ республикайин 12 агъзур ватандаш а. Ляхин пландиз асас вуди гъабхура ва мартдин вазлин аьхириз ккудубкIуз планламиш дапIна.
Гьаму серенжемарихъди сабси РФ-дин оборонайин министерствойин вуз-ариз ватандашар гъядягъбан ляхинра гъабхура.
Эскервалин гьисабнаъ айи, 2026-пи йисан военный гъуллугъназ дих апIру 1996-2008-пи йисари бабкан гъахьи ватандашар хабардар апIбан ляхинра ккебгъна.
Заседаниейиъ эскервалин гьисабназ гъадагъбан серенжемар хъуркьувалиинди кIулиз адагъбан ва гьацира жигьилар военный вузариз артухъди жалб апIбан гьякьнаан, мидихъди сабси жавабдарвал гъабхурайидари жигьиларин арайиъ гъаврикк ккаъбан ляхин гъабхбан теклифар дивнийи. Гьацира ватандашар контрактдиинди военный гъуллугъназ гъадагъбан месэлйирра гъитIирккнийи.
Сергей Меликовди муниципалитетарин ва гъуларин поселенйирин главйирикан, военный комиссариатарин гъуллугъчйирикан, республикайин гьюкмин органарикан гьадму жюре месэлйириз артухъди фикир тувуб табашурмиш гъапIнийи.
