Нариза Таибова

17-пи феврали Хив райондин Асккан Ярккарин уьмуми аьгъюваларин мектебдиъ райондин мектебариъ урхурайи набалугъарин арайиъ волейболин турнир кIули гъубшну.

Талитар 2024-пи йисан 23-пи июнди Мягьячгъалайиъ арайиз гъафи къанунсуз йивбарин натижайиъ террористарин хил’ан уьмриан гъушу ихь ватанагьли, полицияйин гъуллугъчи Тамерлан Ибрагьимовдин гьюрматназ бахш дапIнайиб вуйи.
Серенжем ачмиш апIури, Хив райондин ОКСМПиТ-дин начальник Казбек Къазиевди къайд гъапIганси, мицдар серенжемари артмиш шулайи наслар ватанпервалин, рюгьлувалин гьиссариккди тербияламиш апIбаъ аьхю роль уйнамиш апIура.

– Тамерлан Гьяжиагъаевич Ибрагьимов думу йигъан меркездиъ арайиз удучIву зиянкрарихъди сарпирди женгназ удучIвну. Ислягь ватандашар уьрхюри, жвув уьмрихъ мягьрум гъахьивал фикриз гъадабгъну, думу Урусатдин Президентдин къарарниинди «Кьягьялвалин» ордендиинди лишанлу дапIна.

Гъи, уьлкейиъ гъягъюрайи дявдин гьяракатар фикриз гъадагъну, ухьу йишвариин наслар тялукь ватандашарин гьунарарин бинайиинди тербияламиш апIуз бужлу вухьа. Жигьилди имиди ихь арайиан гъушу игитар насларин кIваълан гьархуз гъитну ккундар, – гъапну К.Къазиевди.

Маракьлуди кIули гъушу талитарин натижайиъ ГъуштIларин мектебдиъ урхурайидар гъалибвалин сабпи йишваз лайикьлу гъахьну. 2-пи ва 3-пи йишвар АрхътIарин ва Хиварин волейболистари гъидисну. Гъалибчи командйир ва волейбол уйнамиш апIбаъ лишанлу гъахьи кIул’инди живанар пулин ва кьиматлу пешкешариинди лишанлу гъапIну.