Наргиз Гюлечова
ТIюрягъ гъул Табасаран райондин чIатху гъуларикан саб ву. Гьелбетда, мушваъ яшамиш шулайи агьалйирин кьадарра аьхюб ву. Аьхиримжи вахтари гъулариъ гъузрайидар асас вуди яшлу касартIан даршра, му гъулаъ айи жигьиларин кьадарра цIиб дар.
Гъулаъ яшамиш шулайи агьалйириз, аьхюр-бицIир дарпиди варидариз, духтрарин кюмек лазим вуди шулу.
ТIюргъярин гъулан духтурвалин амбулаторияйиъ, аьзарлу инсанариз саки 40 йисанкьан баркаллувалиинди медицинайин кюмек туври, акушер-гинекологдин ляхин тамам апIурайи Саргиз Гьяжиризаева лихура. Думу гьаму амбулаторияйин заведующийра ву.
Му касдикан 8-пи мартдиз вуйи газатдин нумрайиъ бикIуб ккун апIури учухьна илтIикIур ТIюргъярин культурайин хулан директор Сураят Гьяжикеримова вуйи. Дугъу Саргиздикан гьамци кIура: «Саргизди инсанарин юкIварик чакан аку хиялар гъитри, инсанвалин заан лишнар улупури, чан ляхин апIура. Ухьуз аьгъюганси, акушер-гинекологдин ляхин гъагъиб ва жавабдарвал айиб ву. Гъийин заманайиъ гъагънаъ айи дишагьлийириз кми-кмиди духтрин кюмек лазим шула. Хъа Саргиз Гьяжиризаева думу кюмек аьзарлу касдиз лазим вуйи саягъниинди гьар вахтна тувуз гьязур ву», – ктибтура Сураят Гьяжикеримовайи.
Саргиз Гьяжимирзаева 1961-пи йисан ТIюрягъ гъулаъ бабкан гъахьну. 1978-пи йисан гъулан кьялан мектеб ккудубкIну, думу Каспийск шагьрин медицинайин училищейик урхуз кучIвну. Училищейиъ заан аьгъювалар гъадагъну ва думу уьру дипломдиинди ккудубкIну, гъулаз кьяляхъ гъафи Саргиз сакьюдар йисарилан ТIюргъярин медпунктдиъ лихуз хъюгъру.
Сураят Гьяжикеримовайи туву мялуматаринди, гъулан медпунктдиъ эвелиан лихурайир сар СаргизтIан дайи. Душваъ аьзарлу инсанар кьабул апIуз лазим вуйи шараитар адрувалиан ляхин апIузра гизаф читинди вуйи. Думу вахтар сарун гъушну, ва Саргиз Гьяжиризаевайикан заведующийра духьну хайлин йисар ву.
Гьамусяаьт ТIюрягъ гъулаъ варитIан читинди дийибгънайи месэла медицинайин хусуси амбулатория адрувал ву. Аьзарлу касар инсанар яшамиш даршулайи хулариъ кьабул апIура.
Дупну ккундуки, гьамусяаьт гъулан амбулаторияйиъ Саргиз Гьяжимирзаевайихъди сабси, дугъан хиликкди участокдин медсестради Зияфет Гьарунова лихури 14 йис, медсестра Валида Мягьямадкеримовайин 10 йис ва фельдшер Сабир Агъасиев лихури 3 йис ву. Йигъандин арайиъ мурари 20 кастIан артухъ медицинайин кюмек ккун апIури илтIикIу гъуландар кьабул апIура.
Амбулаторияйиз илтIикIдарин сагъламвал ахтармиш гъапIган, читин гьялнаъ айидар ашкар гъахьиш, Саргиз Гьяжимирзаева дицдар касар гьяракатниинди райондин больницайиз гьауз мажбур шула.
Сураят Гьяжикеримовайин гафариинди, Саргиздин асас ляхин гъулаъ гьямилади айи дишагьлийир гьисабназ гъадагъуб, 9 вазлин арайиъ дурарин сагъламвалин гъаравлиъ хьуб ву. БицIир хуз вахт вуйи дишагьлийир ФАП-дин заведующийди чан жавабдарваликкди больницайизра гъахура
«Йиз уьмриъ гъабхьи дюшюшнаканра ктибтуз ккундузуз.
1992-пи йисан февралин вазли гъулариъ аьхю йифар, яман аьхълушнар айи. Гъул’ан райондиз саб жюрейинкьан гъябгъруб адайи. Узу гьямилади вуйза, ва бицIир шлу вахт хъубкьнайи. Иццурайи узу райондин больницайиз гъахуз машин гъибихъундайи. Гизаф читин гьялнаъди бицIир хулаъ гъахьунзуз. Эгер гьадмуган Саргиз узуз кюмек гъахьундайиш, я узу, ясана йиз бицIир гъузуб мумкин дайи.
Хайлин йисар душна, хъа вушра думу йигъ йиз зат кIваълан дурубшур. Гьадмуган гъахьи йиз бай гъи чан хизандихъди Екатеринбургдиъ яшамиш шулайиз.
Узуси читин гьялназ гъафи дишагьлийир ич гъулаъ фукьан вушра гъахьну. Гьаруриз Саргиз дилигну, ужуб кюмек тувну. Аьхю чухсагъул чаз», –кIура Сураят Гьяжикеримовайи.
Узура тIюргъярин худул вуза ва вахт-вахтарик, йиз багахьлуйириин улукьуз кIури, дина гъягъюри шулза. Гаф-чIал апIруган, гъуландарикан кми-кмиди Саргиз духтри апIурайи ляхникан, дугъан кIван ачухъваликан, сабурлуваликан, фуну вахтнара кюмекнан хил гьачIабккуз гьязур вуйиваликан ебхьури шулузуз. Гъуландарин гафариинди, му дишагьли гьарсар аьзарлуйихьна хусуси рафтар айи, чан багъри касдихьнаси янашмиш шлу медицинайин гъуллугъчи ву. Иццру касдихьна вуйи дугъан рафтар гъяркъиган, дугъан чав тамам апIурайи ляхнихъ яманди юкIв хъайиб аьгъю шулу.
Гинекологияйин цирклиъ лихурайи Саргизди гьямилади вуйи дишагьлийирин сагъламвал ахтармиш апIувалтIан гъайри, гъулан агьалйириз медицинайин вари терефарихъанди кюмек тувра. Мидланра гъайри, гъулан бицIидариз пландиинди вуйи вари гъяламарра йивура.
«Гьяйифки, магьа швнуд йис ву гъулаъ айи медицинайин амбулатория читин гьялнаъ ади, чарасуз расвалин ляхнар тIалаб апIури. Думу амбулаторияйиъ лихурайи медицинайин гъуллугъчйири, гъулаъ садар хулар дидисну, гьадушваъ инсанар кьабул апIура. Гьаму йисан цIийи ФАП дивуз планламиш дапIна. Гъул райондин центрихьан лап ярхлади ву. Рякъярра ужудар дурувалиан, ТIюргъян Хючназ больницайиз рукьайиз аьзарлу духьнайирин сагъламвализ хъанара артухъ зарар хьуб мумкин ву.
Гьаддиз «Тяди кюмекнан» машин тувруча кIури, райондин администрацияйиан гафра тувна. Машиндиз дурар гизаф ккилигура», – аьлава гъапIну Сураят Гьяжикеримовайи.
