Гьаму гьяфтайиъ улубкьурайи Рамазандин вазра гьисабназ гъадабгъну ва гъи вари дюн’яйиъ арайиз дуфнайи аьгьвалатнахъди аьлакьалу меселйирра хьади узу Дербент шагьрин жвумийин гъудгнар апIру тарихи мистан имам Исамудин-гьяжи Сеидовдихъди гюрюшмиш гъахьунза.
– Исамудин-гьяжи, гъи ухьуз рябкъюрайиганси, инсанарин кIул’ина лап хатIалу уьзур дуфна. Инсанариз гизаф читинвалар духьна, гьюкуматарин экономика хъяляхъ йивура. Увкан гьаму читин аьгьвалатнан гьякьнаан кьюб гаф пуб, улубкьурайи ушварин вазра ихь ватанагьлийириз мубарак апIуб ва инсанариз тербияйин гафарра пуб ккун апIураза.
– Гирами йиз халкь ва гьюрматлу мусурман улматар, чвйир ва чйир. Гъи ихь кIул’ина гьамциб зарарнан уьзур дуфна. Пуз ккундузузки, Аллагьди гъибикIуб фунур касдин кIул’инара гъибди, амма ухьу сабанра дюз рякълан улдугну ккундар. Ухьу гьарган Аллагьу Тяаьлайин рякъюъ ади ккунду. Варибдин кIул сабур ву. Сабур дапIну, ихь президент Владимир Путинди фици ухьуз дупнаш, сацIиб вахтна гьадму къайдайиинди гъуздихьа. Ав, гъи ихь уьмриъ касиб касар цIибтIан имдар, амма игьтияж’вал айи касарин хил бисури, Аллагьдихьна илтIикIнайи касари дурариз ипIруб-убхърубдин кюмек тувра. Ихь дагълу бай Сулейман Керимовдиз, Дербент шагьрин кIулиъ айи Хизри Абакаровдиз ва му ляхниъ иштирак гъахьи имбу касаризра аьхю чухсагъул. Магьа Рамазандин вазра хъубкьна, гъит Аллагьди дицисдар касариз уж’валар дикIри. Ва ихь гирами мусурман улматарикан гьаму уьзриан гъийиху касариз дюаь апIуб ккун апIураза.
Ассаламу аьлейкум ва рягьматуллагьи ва баракату!
Гьюрматлу мусурман чвйир ва чйир! Магьа нубатнан Рамазандин ваз улубкьну. Гьарсар мусурман касдин уьмриъ му вазли асас йишв бисура. Му гирами ваз улубкьбахъди кIваантIан мубарак апIури, учвуз гьарсариз мюгькам сагъ’вал, тамам апIурайи ужудар ляхнариъ хушбахтвал хьуб ккун апIураза. Исламдин рякъюъ учву алдагъурайи гамар ягъурлудар, мюгькамдар ишри. Ичв юкIвариъ иман зияда ибшри. Гунгьарихьан, нягьякь ляхнарихьан, хатIа-балйирихьан ухьу вари ярхла ишри. Амин!
Ислам дин хьуб шартIниин биналамиш дубхьна. 1. Сар АллагьтIан гъайри, жара аллагьар адар. 2. Мягьямад (с.аь.в.) Аллагьди гъаънайир ву дупну, шагьидвал апIувал. 3. Суткайиъ хьуб гъудган апIувал. 4. Гъазанждилан закат тувувал. 5. Рамазандин вазли ушвар дисувал.
Му шартIариан ухьуз аьгъю шулайиганси, Рамазандин ваз ушвар дисру ваз ву. Жара вазариси дарди, му вазли Аллагьу Тяаьлайиз апIру ибадат швнуб-саб ражну артухъ ужара айиб ву.
Ушв бисувал гьаз назил гъапIнуш, гьаддикан.
Аллагьу Тяаьлайи инсан халкь апIуру. Аллагьу Тяаьлайи аькьюл фу вуш, нефс фу вуш, гьамци ахтармиш апIуру: аькьвлихьна илтIикIган, думу Аллагьдин гъаншариз илтIикIуру ва Дугъан амур тамам апIуру.
Аькьвли жаваб тувру: «Уву вува йиз Агъа, йиз Аллагь. Узу вуза яв зяиф лукI». Аллагьди аькьвлиз гьамциб кьимат тувру: «Узу халкь гъапIдарин арайиъ уву варитIан заан дережайиъ ава». Аллагьу Тяаьла чав халкь гъапIу нефсдихьна илтIикIуру ва амур апIуру: «Я инсандин нефс, уву узухьинди илтIибкI». Аллагьу Тяаьлайи дидиз суал тувру: «Фуж вува уву? Фуж ву узу?». Нефсди жаваб тувру: «Узу вуза – узу, уву вува – уву». Аллагьди нефс 100 йислан Жегьеннемдиан адабгъуру ва чан суалар текрар апIуру. Хъасин Аллагьди нефсдиз 100 йисандин муддатнаъ гаш’валиинди жаза тувру, 100 йислан думу гаш’валин жазайиан адагъуру ва Чан суалар текрар апIуру. Нефсди му ражну Аллагьдиз жаваб тувру: «Уву вува йиз Агъа. Узу вуза Яв лукI».
Гьамцдар ахтармишарин кьяляхъ, Аллагьу Тяаьлайи чан лукIариин ушвар дисувалин фарз иливуру. Мягьямад Пайгъамбри (с.аь.в.) чан гьядисдиъ гьамци кIура: «Ушв бисувалин метлеб – лазимсуз гафарихьан, футнайихьан ярхла хьувал ву». Мушв’ан ухьуз аьгъю шулайиганси, Рамазандин вазлин метлеб – ухьуз уж’валарихьна дих, эдеблувал юрутмиш апIувал ву.
Гьюрматлу мусурман чвйир ва чйир! Эгер учву ичв багахьлуйирихъди, мирасарихъди гафар-чIалар дарапIри, дурарикан гиран кади, кIваъ хъял ва такабурвал дибисну гъузиш, учву Аллагьу Тяаьлайиз апIру ибадат кьабул дарапIур. Сари тмунуриз салам туври, сарпирди хил гьачIабккури, арайиъ айи гиранвал гьархуз чалишмиш шули гъахьиш, думу гьяракатари учву ужуз дарапIур, аьксина вуди, Аллагьдин улихьра, инсанарин улихьра зади дерккур. Гирами Рамазандин вазлин гьюрматназ ичв юкIвариъ айи хъюларна наразивалар терг дапIну, марцциди Рамазандин ваз къаршуламиш апIуз дих апIураза учвуз, гьюрматлу ватанагьлийир.
Ассаламу аьлейкум ва рягьматуллагьи ва баракатугьу.
