Зубайдат Шябанова

Мартдин аьхирариъ ва апрелин эвелариъ гъургъу аьхю мархьари республикайин хайлин шагьрар ва районар гъагъи гьялназ гъахну. Кьалу штари гъахи хъархъвсарна гъванар вазариинди марцц дапIну ккунду. Думу ляхнар вари инсанар сатIи духьну тамам апIрудар ву.

 

Табасаран райондиъра зяя ва чиркин духьнайи йишвар марцц апIуб себеб вуди, райондин глава Мягьямед Къурбановди саб вазли гьар султ йигъан райондиъ субботник тешкил апIуб табшурмиш гъапIнийи. Апрель вазли сикин дарди мархьар ургъувалин натижайиъ кьюб гьяфтайин арайиъ думу табшуругъ тамам апIуз мумкинвал гъабхьундар.

Гьавйир сацIиб мани гъахьибси, райондин вари гъуларин жямяаьтар, мектебариъ урхурайи баяр-шубар чпи яшамиш шулайи йишварин аьтрафар къайдайиз хпан ляхнарихъ хъюгъну. Иллагьки гъуларин кючйир ва машинар гъягъру рякъяр гъагъи аьгьвалатназ дуфнайи. Рякъяризси, табиаьтдинна тарихи ядиграриз, паркариз, жямяаьтлугъ уч шлу йишвариз асас фикир тувра. Мархьарин кьалу штари гъабхи хъархъвсарихьанси, думу йи-швар къанунсузди арайиз духнайи урсларихьанра марцц гъапIну.