Зубайдат Шябанова
«Ужуб гафну гъван гъюдли апIуру», – кIуру гафар узуз яшлу касарикан кми-кмиди ерхьури шулу. Дугъриданна, бязи инсандин кIваъ айи миркк ебцIбан бадали, саб мани гаф чIяаьн ву. Гьамциб фикир ади гьар йисан «Гъит ужуб гафну кIван гевюл ачухъ апIри» ччвур али конкурсди вари уьлкейиан варжариинди бажаранлу авторар сатIи апIура.
Гьаму Урусатдин конкурсди гьарсар мялимдиз ва урхурайириз прозайиъ, поэзияйиъ ва драматургияйиъ чпин мумкинвалар улупуз рякъ абццра.
Цци конкурсдиъ гъалибвал гъадабгъдарин арайиъ «Уж’валин дирижер» авторский пьесара а. Думу Дербент шагьрин Р. Гьямзатовдин ччвурнахъ хъайи 20-пи нумрайин мектебдин ккергъбан классарин мялим Бесханум Исмяиловайин (шиклиъ) регьберваликкди 5-пи классдиъ урхурайи Аьйша Халикьовайи (шиклиъ)гъибикIуб ву. Пьесайин сюгьюрчивал гьаддиъ аки, диди жвувкан кадабгънайи художествойин ихтилатнаъ рягьимлувалин ва мяргьяматлувалин гьякьикьи игитрин сурат атIабгура.
Пьесайин асас игит табасаран дишагьли, вари уьлкейиз машгьур вуйи Санкт-Петербургдин «Инвалидарин коляскйириъ айидарин машквар» проектдин руководитель Эльвира Асланова ву. Учу газатдиъ улихьна йисари дугъкан макьала гъибикIнийча.
«Ич пьесайиъ учуз конкурсдин жюрийин вакиларин юкIвариз тясир тувру сюжет кабадгъну гъибту цIиб вуди. Гьаддиз учу пьесайин игитрин уьмур бинайиан ахтармиш гъапIунча. Натижайиъ «Коляскйириъ айидарин бал» серенжем мукьмаринна инсандихьна вуйи ккунивалин дугъри драматургия вуйивалин шагьидар гъахьунча. Уьмрин гъагъи аьгьвалатнаъ ахьнайи бицIидариз кюмек тувру «Аревик» центри коляскйириъ айи ва ришвуз даршлу бицIидариз шадлугънан серенжемар тешкил апIури 25 йистIан артухъ ву.
2024-пи йисхъанмина думу серенжемдиз Санкт-Петер-бургдин правительствойи ва культурайин комитетди ужуб кьимат тувбан кьяляхъ, коляскйирин бал халкьарин арайиъ вуйи машквраз илтIибкIну. Думу «Йисандин варитIан ужуб гьядиса» премияйиз лайикьлу гъабхьну ва Урусатдин варитIан ужудар 111 проектарин дахилназ гъадабгъну. Дидин бинайиан гьязур гъапIу пьесайиз ич жюрийира варитIан заан кьимат тувнийи. Хъа заан ччвурарин кьяляхъ гьаммишан чIиви инсан хъади шулу. Ва гьадму ихь риш Эльвирайин важиблу роль учу ич пьесайиъ заан дережайиъди улупунча», – гъапну Бесханум Исмаиловайи.
«Гъит ужуб гафну кIван гевюл ачухъ апIри» конкурсдин натижйир апрелин аьхириъ Каспийск шагьриъ гъивнийи. Думу гъалибвал авторизна дугъан мялимдизси, вари проектдизра важиблуб гъабхьну. Конкурсдин шартIариинди варитIан ужудар яратмишариз бахш дапIнайи саб китаб тартиб апIиди.
