Зубайдат Шябанова
Улихьна йигъари Табасаран райондин Хючна гъулан вакил, Дагъустандин гьюкуматдин медицинайин университетдиъ урхурайи Самира Рамазанова Урусатдин сагъламвалин цирклин гъуллугъчйирин профсоюзди тешкил гъапIу Вариурусатдин ватанпервер мяълийирин фестивалин лауреат гъахьну.
Москва шагьриъ концертар гъахру «Измайлово» залиъ фестивалин гала-концерт кIули гъубшнийи. Душваъ вари уьлкейиан 20 финалист иштирак гъахьну. Дурарин арайиъ Самира Рамазановара айи. Дугъан «Урусат ва Кавказ» мяъли варидариз кьабул гъабхьнийи. Концертдин зал сабвалин ва ватандиинди дамагъ апIувалин гьиссари абцIнайи. Фестивалин гьарсар иштиракчийи чан мяъли лап успагьиди тамам гъапIну. Дурар вари багъри уьлке ккунивали ва ватанпересвали сатIи апIурайи.
Гьарсар иштиракчийин мяълийиз кьимат тамашачйири туврайи. Дурари туву сесерин натижайиъ Самира Рамазановайи кьюбпи йишв гъазанмиш гъапIну. Гала-концертдин вари финалистар гьюрматнан грамотйириинди ва тялукь призариинди лишанлу гъапIну.
Концертдин кьяляхъ Самирайиз хайлин тамашачйири ва фестивалин иштиракчйири, чпиз дугъан мяъли, думу тамам апIбан саягъ лап кьабул гъабхьиваликан кIури гъахьну.
Самирайи Дагъустандин гьюкуматдин университетдин 6-пи курснаъ ужудар аьгъювалариз урхура. Медицинайин пишекар хьуз дугъан бицIивахтнахъанмина аьшкь ади гъабхьну. Табасаран райондин гимназия гъизилин медализ ккудубкIну, Самира чан кIваъ айи пишейин эйси хьуз вуздик кучIвну.
«Узу бицIидарин багъдиъ айи вахтарихъанмина мяълийир апIуз хъюгъюнза. Мектебдиъ, хъасин университетдиъ кми-кмиди концертарин программйириъ иштирак шули гъахьунза. Гьамусра республикайин вузарин арайиъ гъягъру вари серенжемариз узуз теклиф апIури шулу. Вариурусатдин фестиваль РФ-дин сагъламвалин цирклин гъуллугъчйирин профсоюзди тешкил гъапIуб вуйи. Ихь республикайиъ айи профсоюздин кIулиъ айидари узуз думу конкурсдиъ иштирак хьуз теклиф гъапIну.
Фестивалиъ вари уьлкейиан 217 кас иштирак гъахьну. Жюрийи дурарикан варитIан ужудар 20 номер гъядягъну. Ва дурарин арайиъ конкурсдин финал Москва шагьриъ тешкил гъапIну. Гьадму 20 касдин сиягьнаъ узура айза.
Йиз мяъли варидариз кьабул гъабхьнийи. Хъа узу алабхьнайи палат гьадму концертдиз узу гьязур гъапIуб вуйиз. Дагъустандин халкьарин милли палтарикан варитIан мяна айи накьиш адабгъну, дагълу дагъустан дишагьлийин саб уьмуми палат гъибирхунча. Мидланра гъайри, узу тамам гъапIу мяълира гизаф успагьиб ва ватанпервервалин кьувват айиб вуйи. Узу думу мяъли университетдиъ 3-пи курснахъанмина тамам апIураза», – гъапну ич сюгьбатнаъ Самирайи.
Самира гьамусяаьт «Студентарин хьадукар» серенжемдихьна ва майдин машкврарихьна гьязур шула. Мидланра гъайри, ихь шуран улихь гьамусяаьт аьхиримжи сессия хьа. Гъит дугъан алдагъурайи гамар заан хъуркьувалар ва берекет хъайидар ишри!
