Зубайдат Шябанова

 

Табасаран райондиъ апрелин 24-пи – 27-пи йигъари «Кьибла Дагъустан: туризм ва хялар кьабул апIуб» ччвур али стратегический сессия гьяракатнаъ ади гъабхьну. Райондиз думу важиблу ва гележегдиз ужудар мумкинвалар тувру серенжем гъабхьну.

 

Сессияйин иштиракчйири, образованиейин лекцйирихъ хъпехъбан кьяляхъ, Дагъустандин кьибла терефнаъ туризмдин индустрия артмиш апIбан цирклиан чпин проектар тартиб гъапIну.
Му серенжемдин Программайин садпи йигъ Табасаран райондин туристический йишварихъди таниш хьпаз бахш дапIнайиб вуйи. Хялариз райондин тарихи асас йишвар улупбан кьяляхъ, Жямяатлугъ жягьтлувалар уьрхру центрин гъуллугъчйири туризмдин цирклиъ социальный проектированиейиан дарсар гъухну.

Кьюдпи йигъан теклиф дапIну райондиз дуфнайи экспертарин иштираквал ади интерактив жюрейиинди сессия гъабхьну. Спикерари жигьиларихъди бинайиан туризм артмиш апIуз кюмек тувру проектар фици тартиб апIуруш, хялар жалб апIбан бадали гьапIну ккундуш, мюгькамди ккабалгнайи туристический маршрутар гьяракатнаъ фици ирчруш ва жара асас темйирикан гъулхнийи.

Сессияйин иштиракчйир Табасаран райондин глава Мягьямед Къурбановдира къаршуламиш гъапIну.
Жигьилари Кьибла Да-гъустандиз туристар жалб апIбан цирклиан чпин фикрар проектариз адагъну ва дурар экспертарин улихь уьрхюри гъахьну. Дурарин ляхнариз кьимат тувру жюрийин дахилнаъ, туризмдин цирклиин экспертарси, Табасаран райондин администрацияйин вакиларра айи.
Къайд апIуз ккундучуз, «Кьибла Дагъустан: туризм ва хялар кьабул апIуб» стратегический сессияйин тешкилатчи жигьиларин жягьтлувалариз кюмек тувру «Исчйир» фонд ву, хъа серенжем Дагъустан Республикайин главайин грантарин дакьатарихъ кIулиъ гъубхуб ву.