Наргиз Гюлечова
2026-пи йисандин туриствалин фасил Дагъустандиъ сарун ккебгъна гъапишра, гъалатI даршул. Ккудубшу йисан ихь республикайиз Урусатдианси, харижи уьлкйирианра кади, саки 2 миллиондихьнакьан туристар гъафну. Ццира гьадму кьадар туристар гъюру кIури, умуд ка, хъа вушра, аьхиримжи вазлин арайиъ Дагъустандиъ дубхьнайи табиаьтдин завалихъди аьлакьалу вуди, вахт ккимиди ухьухьна гъюз кIури, планламиш дапIну турар гъадагънайи хайлин касари, чпин къарар батIул апIура.
Туриствалин фаслихьна гьязур хьпан ва алахьурайи читинваларин гьякьнаан улихьна йигъари Дагъустандин туризмйинна халкьарин художествойин сяняаьткарваларин министр Эмин Мердановди республикайин журналистарихъди ва кIакIначи гидарихъди пресс-конференция гъубхьну.
Чан улхбаъ Мердановди асас фикир туризмйин цирклиъ уьмриз кечирмиш апIурайи проектариз, республикайиъ хялар кьабул апIбахьна вуйи гьязурлугвалариз, дурарин хатIасузвал уьбхбаз, туриствалин объектарихьна вуйи рякъяриз ва жара инфраструктурайиз тувнайи.
Пресс-конференция ачмиш апIури министри мялум гъапIганси, Дагъустан ццира гизаф хялариз ккилигура.
«Ккудубшу йисанси, гьаму йисанра республикайиз гъюру туристарин кьадар аьхюб шул кIури, умудлу вуча. Ухьухь гьаму гьядисйир хьувалиинди, майдин вазли Дагъустандиз гъюз планламиш дапIнайи туристар цIиб кам гъахьну, хъа сарун хьадан вазари гъюрударин кьадар артухътIан артухъ шула ва Дагъустан туристар гизаф гъюрайи ихь уьлкейин регионаринкан саб ву кIури, Урусатдин туриндустрияйин союздиан мялумат дуфна», – гъапну министри.
Гьамусяаьт Дагъустандиз гъюрайи туристар асас вуди Кафари терефназди гъягъюра, кьибла терефназди гъюрайи хяларин кьадар лап цIибди ву. Гьамдихъди аьлакьалу вуди, Дербент район кадарди, Кьибла Дагъустандин имбуну районариз гьаз инвестицйир жалб апIурадарш, министрихьан гьерхунза. Йиз суалназ жаваб вуди дугъу гьамци гъапнийи: «14 агъзуртIан артухъ туристар кьабул апIру инвестицйирин аьхю проект «Каспийский кластер» уьмриз кечирмиш апIбан кьяляхъ, кьибла терефназди гъюру туристарин кьадар швнуб-саб ражари артухъ хьибди. Месэла гьял апIбан бадали зегьмет зигура, вушра инвестицйир гъирагъдилан жалб апIайиз ккилигну ккундар. Муниципалитетариъ туристар кьабул апIуз шлу йишвар аш, душвариъ жвилли алверчивал артмиш апIури, дурар жалб апIуз машгъул духьну ккунду.
Серенжемдиъ иштирак шулайи Эмин Мердановдин заместитель Анна Безруковайи къайд гъапIганси, Дагъустан табиаьтди заваликк ккабхъиган, Мамедгъалайиз кюмекназ 20 агъзуртIан артухъ волонтерар гъафну. Гьадрарикан 20% жара регионариан туристарси дуфнайи волонтерар вуйи. Дугъу, гьамусдихъанмина къанундиинди тасдикь дапIну, волонтервалин туризм артмиш дапIну ккунивалин месэлара гъитIибккнийи.
Пресс-конференцияйин аьхириъ министри къайд гъапIанси, республикайин метлеб анжагъ гизаф туристар кьабул апIуб дар. Региондин асас метлеб гьаму деврин тIалабариз жаваб тувру, дурумлу, чаинди дамагъ апIуз шлу, гъюрайи хялариз хатIа кадру туризм армиш апIуб ву.
