Гюльнара Мягьямедова
Мягьячгъалайиъ Урусатдин МЧС-дин Дагъустандиъ айи идарайиъ Урусатдин МЧС-дин ватандаш оборонайин ва агьалйир уьрхбан департаментдин директор Олег Мануйлойин регьберваликкди ведомствйирин арайиъ айи гьяракатнан штабдин заседание кIули гъубшну. Заседаниейиъ РФ-дин Президентдин Кафари Кавказдин федеральный округдиъ гьуркIу ихтиярар айи вакилин заместитель Мягьямед Рамазанов ва Дагъустандин правительствойин председатель Аьбдулмуслим Аьбдулмуслимов иштирак гъахьну.
Видеоконференцияйин къайдайиъди гъябгъюрайи заседаниейиъ Урусатдин Роспотребнадзорин, Рос-гидрометдин ва гьацира тикилишчивалин, сагъламвал уьбхбан, мярифатнан, транспортдин, энергетикайин, цифровой артмиш’валин, гъулан мяишатдин федеральный министерствйирин, Росводресурсарин ва Ростехнадзорин вакиларра иштирак гъахьнийи.
РД-йин Правительствойин председателин заместитель Рамазан Жяфаровди гъапиганси, гъийин йигъаз республикайиъ шту ккаънайи хулар, бистнар имдар. Хасавюрт райондиъ кьалу шту гъабхи ар марцц апIура.
«Жил кучвубхурайи дагълу районар асас гюзчиваликк уьрхюрача. Уьмуми кьадар 19 агъзуриина хулар ахтармиш дапIна. Аьлава улупбариинди, 7 агъзур хулариз зарар дубхьна, зарарнан дережа а: капитально рас дапIну ккунидар, яшамиш хьуз шлудар ва кIан’ан кIулиз дадаргънайидар», – гъапну Жяфаровди.
Вахтназ вуди инсанар яшамиш шулайи 13 пунктнаъ 546 кас ерлешмиш дапIна. Дербент райондиъ ва Мягьячгъалайиъ Роспотребнадзорин РД-йин идарайин, Урусатдин МЧС-дин, волонтерарин кьувватариинди инфекция марцц апIбан ляхнар гъахура. Хасавюрт райондиъ, Аьдил-отар гъулаъ ктарди, инфекцияйихьан марцц апIбан ляхнар ккудукIна.
Заседаниейиъ РД-йин зегьметнан министерствойин кIулиъ айи Мягьямадзагьид Кихасуровди гъапиганси, 27-пи апрелиз айи улупбариинди, 8190 аьрзайин гьякьнаан 345 миллион манат тувбан къарар адабгъна.
Дагъустандиъ гъургъу аьхю мархьари туву зарарикан РД-йин тикилишчивалин, архитектурайин ва ЖКХ-йин министрин заместитель Салам Гьясайниевди ктибтнийи.
Дугъу мялуматар тувганси, Мягьячгъалайиъ, Каспийскдиъ, Избербашдиъ, Буйнакскдиъ, Дагъустандин Огнийиъ, Дербентдиъ, Кизляриъ, Кьибла Сухокумскдиъ, Хасавюртдиъ штухъди тямин апIбан гъурулуш къайдайиъди либхура.
Мягьячгъалайиъ Тарнаирка нирин шид гъябгъюз манигъвал туврайи, къанунсузди тикмиш дапIнайи хулар-йишвар алдагъуб давам апIура. Мягьячгъала шагьрин администрацияйин главайин заместитель Нариман Батырбиевди гъапиганси, Акъушинскийин ччвурнахъ хъайи кючейиъди шагьрин накьварихънакьан йишваъ хулар ахтармиш дапIна. Дурарин 50% эйсйир шагьрин мэрияйин кюмекниинди чпин хулар алдагъуз разивал тувну. Имбу 12 объектдин эйсйир агура. Ляхин давам шула.
Хасавюрт ва Дербент районарин главйири чпин муниципалитетариъ айи агьвалатнаканра мялуматар тувну. Дербент райондин кIулиъ айи Эльман Аллагьвердиевди гъапиганси, гъушу жвуми, киш ва элгьет йигъари Мамедгъалайиъ Урусатдин МЧС-дин Донской гъуллугънан кюмек тувру дестейи руг адабцIну, инфекцияйихьан марцц апIру ляхнар гъухну, подвалариъ айи шид марцц гъапIну.
Хасавюрт райондин главайин вазифйир гъахурайи Багьудин Мамаевди 750 хулар ахтармиш дапIнайиваликан гъапнийи. Думу кьадарнакан саб пайназ капитальный расвалин ляхнар лазим ву, тмуну пайнаъ яшамиш хьуз шулу, сабсан пай дадаргъна. Зарар гъабхьи вари хулариз эйсивалин документар адар. Мамаевдин гафариинди, асас месэла Аксай ва Акташ нирарин гъирагъариъ марцц апIбан ляхнар гъахуб ву. Аьхю мархьарин вахтна нирариз гъахи гьарар-кюлери даграр арайиз хура.
Заседаниейин аьхириъ жавабдар идарйирин кIулиъ айидариз табшуругъар тувнийи.
