6-пи майди лисхъан сяаьт 2-ди Мягьячгъалайиъ Халкьдин Собраниейин заседанйир гъахру залиъ республикайин вакилар Дагъустан Республикайин главайин вазифйир вахтназди тамам апIуз хъюгъю Федор Щукиндихъди таниш апIбан серенжем кIули гъубшну.
Серенжемдиъ РФ-дин Президентдин СКФО-йиъ гьуркIу ихтиярар айи вакил Юрий Чайка, РД-йин главайин вазифйир вахтназди тамам апIурайи Федор Щукин, мидиз улихьна региондин кIулиъ ади гъахьи Сергей Меликов, РФ-дин Президентдин СКФО-йиъ гьуркIу ихтиярар айи вакилин заместитель Мягьямад Рамазанов, РД-йин Халкьдин Собраниейин председатель Заур Аскендеров, РФ-дин Госдумайин Дагъустандин терефнаан вуйи депутатар, республикайин парламентдин депутатар иштирак гъахьнийи.
Серенжем ачмиш гъапIу Заур Аскендеровди Юрий Чайкайиз гаф тувнийи. РФ-дин Президентдин СКФО-йиъ айи вакили Владимир Путиндин указ гъурхнийи. Дугъу Сергей Меликовди региондин кIулиъ ади саки 6 йисан гъапIу ляхниз чухсагъул гъапнийи ва дугъан тажруба цIийи гъуллугънаъ лазим шлувалик умуд кивнийи.
Юрий Чайкайи Федор Щукин цIийи гъуллугънаъ дерккбахъди тебрик гъапIнийи. Дугъан улихь дийигънайи месэлйирикан улхури, федеральный гьюкмин вари органари, ватандашари думу месэлйир кIулиз адагъбаъ кюмек тувуз гьязур вуйиваликан гъапнийи.
Юрий Чайкайин гафариинди, гьамусяаьт региондин улихь дийибгънайи асас месэла мартдин аьхириъ ва апрелин садпи йигъари республикайин бязи районариъ гъургъу аьхю мархьари гъахи бедбахтвалар арайиан адагъуз ва зарар гъабхьи гьарсар касдиз кюмек тувуб ву. Полпредди сударин гъурулушдиъ лихури Щукиндиз айи тажрубайи дугъ’ина аманат дапIнайи ихтиярар хъуркьувалиинди уьмриз кечирмиш апIбаъ мумкинвалар туврувалик умуд кивну.
Хъасин Сергей Меликовдиз гаф тувнийи. Чан улхбаъ региондин кIулиъ ади гъахьири Верховный кIулин командующийин ва Дагъустандин халкьдин хъугъвал намуслувалиинди уьбхюз чара апIуваликан, республикайиъ гьяракатнаъ айи проектарикан, ляхин апIуз гьязур вуйи команда айиваликан гъапнийи.
Чан улхуб дугъу Расул Гьямзатовдин гьаму гафариинди ккудубкIнийи: «Чан сяаьт улубкьган, уьмри йиври натижа, узу вари гъапунза, узхьан шлубра гъапIунза».
Серенжемдин аьхириъ Федор Щукиндиз гаф тувнийи. Дугъу чан терефназ гъапи мани гафариз, чаина ихтибар апIбаз чухсагъул гъапнийи. «Узу Дагъустандиъ яшамиш шули 2 йистIан артухъ вуйиз. Вари районариъ гъахьунза. Республика жюрбежюр миллетар сатIи дапIнайи битав ву. Республикайиъ «Дагъларин жюр’этлувал» проект уьмриз кечирмиш апIура. Хусуси метлеб айи дявдин операцияйин ветеранар ерли самоуправлениейин органариз жалб апIидихьа, дурари, халкьдин гъуллугънаъ ади, шагьрариъ ва гъулариъ ляхин дапIну ккунду. Гьюрматлу гъарашугъар, ляхин апIру ачухъ, гьякьлу десте лазим ву. Узу Дагъустандиз гъуллугъ апIуз гьязур вуза», – къайд гъапIнийи дугъу.
