Наргиз Гюлечова

26-пи июнди Мягьячгъалайин «Дуствалин хулаъ» ляхин ккуни касариз «Урусатдин ляхин. Мумкинвалариз вахт 2026» Вариурусатдин ляхнин муштарйирин ярмакайин федеральный этап кIули гъябгъиди. Думу ярмаркайиъ Дагъустандин 105 жюрбежюр компанйири ляхин абгурайи касариз 2000-тIан артухъ ляхнин йишвар улупиди кIури, РД-йин зегьметнанна яшайишдин артмиш’валин министерствойин пресс-гъуллугънаан хабар тувра.
Чпин кIваз хуш вуйи ляхин абгури му ярмакайиз гъафи касариз, гьадму йигъан ляхнихъди тямин апIру касарихъди гюрюшмиш духьну, гаф-чIал апIузра мумкинвал хьибди.

Цци му ярмаркайиъ арайиз адагъру 2000-тIан артухъ вакансйир, асас вуди энергетикайин, транспортдин, сагъламвалин, гъулан мяишатдин ва жара ужуб маважиб тувру цирклариан ву. Эгер учву вая ичв хизанарикан шликIа, гьадму гьисабнаан студент бали-шуру гьаргандиз, ясана хьадан тятIиларин вахтназ ляхин абгури аш, ярмаркайиъ иштирак йихьай.