Гюльнара Мягьямедова

Июндин 5-пи йигъан Урусатдин Президент Владимир Путинди ихь ватанагьли Ярамир Темирхановдиз генерал-майор ччвур тувну.

 

Ярамир Темирханов, Дербент райондин Билижи (Куркакк) гъулан агьали, Урусатдин Игит, Кьягьялвалин шубуб ордендин кавалер, Донецкдин Халкьдин Республикайин Игит ву. Дугъан командованиейиккди Урусатдин яракьлу кьувватарин дестйири чпиз цIибра зарар даршлуси душмандин мюгькамди уьрхюрайи пунктар гъидисну, Северск азад апIбаъ иштирак гъахьну, женгар гъахурайи варитIан читин месэлйир гьял апIури гъахьну. Верховный кIулин командующийи, Я. Темирхановди женгариъ гъадагънайи хъуркьуваларикан дупну, дугъаз чухсагъул мялум гъапIнийи.

Ярамир Буйнатялиевич! «Табасарандин нурар» газатдин редакцияйин коллективдин ва газат урхурайидарин терефнаан увуз генерал-майор ччвур тувбахъди кIваантIан уву тебрик апIурача. Уву табасаран халкьдин Урусатдин Игит ччвурназ лайикьлу гъахьи вакиларикан сар вува. Гвардияйин 6-пи мотострелковый жаради вуйи бригадайин кIулиъ ади ва кьягьял ватанагьлийирин машгьурвалин рякъ давам апIури, уву ихь халкьдин аднан дережа хъана за гъапIунва.

Уьлкейин президент Владимир Путинди гъапиганси, уву халис эскер, Урусатдин ватанпервер ва ужур командир вува.
Гьюрматлу Ярамир Буйнатялиевич! Учу бицIи Ватандин аьхю игитариинди дамагъ апIурача. Гъит Аллагьу Тааьлайи увуз мюгькам сагъвал туври, хъана заан хъуркьуваларихьна рякъ ачмиш апIри, яв улихь дивнайи эскервалин мажбурнамйир ва месэлйир гьял дапIну, Гъалибвал хьади хулаз кьяляхъ гъюриву.

Ихь табасаран халкьра таза генералихъди тебрик апIурача. Гьамус ихь бицIи халкьдиз хьур генерал а: генерал-полковник Рустам Мурадов, генерал-лейтенант Эседулла Абачев, генерал-майор Зиявудин Аьбдурягьманов, генерал-майор Аьлибег Асланбегов, генерал-майор ЯрамирТемирханов.