Табасаран эскрар – Ватандин Аьхю дявдин иштиракчйир

 

Рамазан Шябанович Мазаев

1919-пи йисан Табасаран райондин Ругуж гъулаъ нежбрин хизандиъ бабкан гъахьну.

 

Гурихъ гъулаъ мектеб ккудубкIну, 1936-пи йисан Орджоникидзе шагьриъ педагогвалин училищейиъ урхувал давам гъапIну. 1939-пи йисан Рамазан Мазаевдиз Уьру Армияйин жергйириз дих гъапIну. Дугъу Ярхла Ригъ гьудубчIву терефнаъ Уссурийск шагьриъ, хъа 1940-пи йисан сентябрин вазлилан башламиш дапIну, Литвайиъ гъуллугъ апIури гъахьну.

Рамазан Мазаевди чан сабпи женг 1941-пи йисан июндин вазлиъ Клайпеда шагьриъ кIули гъубхну. 1942-пи йисан думу сабпи наградайиз лайикь гъахьну. Дугъаз «Дирбаш’вал улупбаз лигну» медаль, гьацира «Уьру Хяд» орден тувну.

1944-пи йисан Белоруссия душмандихьан азад апIруган, дявдин женгнаъ Рамазан Мазаевдиз гъагъи зиян гъабхьну. Думу, Ватандин Аьхю дявдин инвалид духьну, аьхюну лейтенантдин званиера ади фронтдиан чан гъулаз гьаъну. Дявдин кьяляхъ йисари Рамазан Мазаев мектебдиъ мялимди, «Уьру партизан» колхоздин председателди лихури гъахьну.