Гьамусяаьт республикайиъ коронавирусдин уьзрихъди аьлакьалуди арайиз дуфнайи аьгьвалатну республикайин зегьметнан рынокдиз аьхю тясир тувра. Му читин гьял пучIу апIбан бадали, Урусатдин регионариъ зегьмет зигбан шартIар гъулай апIбан серенжемар кьабул дапIна. Гьаци, РД-йин зегьметнанна яшайишдин артмиш’валин Министерствойи, республикайин саб жерге карханйир федералин бюджетдин дакьатарихъ кIули гъахру кризисдиз аькси вуйи серенжемариъ иштирак хьпан зиин ляхин гъабхура. Думу серенжемар исихъ ктухурача:

 

— ляхниан адаъбан хатIа арайиз дуфнайи зегьметкешар вахтназди ляхнихъди тямин апIуб (6 вазлизкьан 1 касдин кIулихъ 15 793 манат туври);

— карханйириъ ляхниан адаъбан хатIа арайиз дуфнайи зегьметкешариз жямяаьтлугъ ляхнар тешкил апIуб (6 вазлизкьан 1 касдин кIулихъ 15 793 манат туври);

— карханйириъ ляхниан адаъбан хатIа арайиз дуфнайи зегьметкешариз, дюшюш улубкьайиз улихьна цIийи пише дубгъбан бадали тялукь дарсар кивувал (1 касдин кIул’ина — 25 000 манат);

— жара карханйириан ляхниан адаъну, гьамусяаьт ляхин адарди деънайи ваталахьлийириз цIийи лихру йишвар тешкил гъапIу карханйириз, чпи гъуху харжарин саб пай ккебкузпулин кюмек тувувал(3 вазлизкьан, 1 касдин кIулихъ 15 793 манат);

— бикарариз аьлава лихру йишвар ачмиш апIбан бадали, карханйирин кIулиъ айидар гьевеслу апIувал (1 ляхнин йишваз 100 000 агъзур манат);

— хул’ан ляхин апIуз шартIар тешкил гъапIу ляхин туврайидарин харжар ккаубхуб (1 ляхнин йишваз 100 000 агъзур манат);

— бикар ватандашариз, жюрбежюр жара ляхнар апIури гъахьидариз, дурар чиб-чпи ляхнихъди тямин апIрударси гьисабназ гъадагъруган, пулин кюмек тувуб (1 ляхнин йишваз 100 000 агъзур манат).

Республикайиъ гьаму серенжемар кIули гъахбан бадали, федералин бюджетдиан Дагъустан Республикайиз деетру пулин кьадар (дидин 5% республикайин бюджетдианжара дапIну ккунду)гьамусяаьт тяйин апIура.

Улупнайи серенжемар уьмриз кечирмиш апIбаъ ляхниан адаъбан хатIа арайиз дуфнайи зегьметкешар лихурайи карханйиризра иштирак хьуз мумкинвал а.

Мидлан савайи, РД-йин зегьметнанна яшайишдин артмиш’валин Министерствойи, «Ватанагьлийириз ляхин тувуб» республикайин программайин дахилнаъди, ляхин туврайи касариз кюмек апIура:

— инвалидар ляхниз гъадагъбаз ва дурариз лихру йишв гьязур апIбаз (1 ляхнин йишваз 76 агъзур манат);

— инвалидарин жямяаьтлугъ тешкилатари тешкил гъапIу жюрбежюр карханйириъ ляхин апIурайидарин маважибдиз харж гъахьи дакьатарин компенсация вуди субсидйир деетна (6 вазлизкьан 1 касдин кIулихъ 15 793 манат).

РД-йин зегьметнанна яшайишдин артмиш’валин Министервойи ляхниъ адру вая саб ляхниин машгъул дару касариз хусуси ляхин ачмиш апIбаз кюмек тувру — сар касдин кIулихъ 96 агъзур манат. Гьацира,  вахтназди вуйи ляхнар тамам апIурайи бикар касариз кюмек вуди вазлин арайиъ 3 агъзур манат тувувал улупна.

Мидлан гъайри, республикайин бикарар ляхнихъди тямин апIру центрарра бикарариз ляхин абгбаъ кюмек тувуз гьязурди ву.

Зиихъ улупнайи уьлчмйир уьмриз кечирмиш апIбиинди, жюрбежюр сурсатар, шей’ар гьясил апIурайи карханйириъ лихру йишвар уьрхюз кюмек хьибди.