Июлин 1-пи йигълан тина, Дагъустандин аьтрафариин «Пишекарвалин гъазанждилан алдабгъру налог» – хусуси метлеб айи налогарин къайда дебккувал планламиш апIура. Къанундин проектди ватандашариз дилаварчивалин ляхин рягьят шартIариъ гъабхуз ва жвуван гъазанжар къанундиз асас вуйидар апIуз мумкинвал тувди.

 

Налогдин гьякъи физический касариин 4%, хъа юридический касариин 6% илипбанди ву. Пишекарвалин гъазанждилан алдабгъру налог – му аьлава налог дар, думу цIийи хусуси метлеб айи, жюрбежюр бакришнар гьясил апIру ясана гъуллугъар гьуркIру ва жара касарин зегьмет ишлетмиш дарапIру, йисандин арайиъ 2,4 миллион манаттIан артухъ пул оборотдиъ адру дилаварчйириз чпиин илирчнайи налогар цIиб апIуз мумкинвал тувру налогарин къайда ву.

Гьаци вуйиган, чав-чаз ляхин абгурайи ватандаш НДФЛ-диккан, НДС-диккан, медицинайин ва пенсйирин фондариз вуйи страховой взносариккан азад апIиди.