Армияйиъ гъуллугъ апIувал – му сифтена-сифте дявдин гьязурлугъвал ву. Армияйи аьдати жигьил баярикан халис жилар апIуру, фицики душваъ жигьилар ужубдихъдира, харжибдихъдира таниш шулу.
Гьаддиз бай армияйиз гьаъруган, гьарсар дадайин кIвак гъалабулугъвал кабхъру: цIийи къайда, цIийи дустар, цIийи йишвар, цIийи командирар. Йишвну нивкI’ан уягъ гъахьи дадайин кIваъ армияйиъ гъуллугъ апIурайи бай ади шулу, армияйиз душну гъяйиз, дугъу йигъар ктухуру.
Гьамусяаьт вари ихь уьлкейиъ хьадукран призывдин вахт гъябгъюра. Гизаф дадйири чпин баяр сад йисазди армияйиз гьаъра, хъа гизафдар – баяр армияйиан гъюбаз ккилигура.
Бали армияйиъ гъуллугъ апIури, магьа саки сад йис дубхьнайи, Хив райондин Гъвандикк гъул’ан вуйи Гъизигюл Велихановайиз улихьнаси гьамциб кагъаз гъафну.
«Гьюрматлу Гъизигюл Закиевна! Увухьна илтIикIурайир яв бай Багъир Аьбдурашидович Велихановди гъуллугъ гъабхурайи дявдин 51858 частнан командир ву.
Чав гъуллугъ гъабхури гъахьи вахтна Багъири учв гьякьлур, низам-къайда хъайир, зегьметниин юкIв алир вуди, жавабдар эскерси ва ужуб юкIв айи юлдашси улупну.
Рядовой Б.Аь.Велихановди чав гъуллугъ апIурайи вахтна эскервалин пише гъудубгъну, чахьна тувнайи яракь ва дявдин техника ужуди аьгъю гъапIну, ужуб пишейин эйси гъахьну. Дугъу чан эскервалин устадвал лап кIваантIан мюгькам апIури, дявдиз гьязурлугъвалин лап ужудар натижйир улупура, спортдиин ужуди машгъул духьну, хъуркьувалар улупура, чан подразделениейиъ гъахру жямяаьтлугъ ляхнариъра ужуди иштирак шула. Командирарихьна, юлдшарихьна, чахъди гъуллугънаъ айи эскрарихьна аьхю гьюрмат улупура, апIру гафнан саягъ уьбхюра, коллективдиъ чазра лайикьлу гьюрмат а.
Ич полкнан хусуси составдин ва йиз терефнаан, Гъизигюл Закиевна, гьамцир бай тербияламиш апIбаз увуз аьхю чухсагъул мялум апIураза. Увхьан яв бал’инди дамагъ апIуз шулвухьан, уву ихь Ватан уьбхру лайикьлу кас аьхю гъапIунва.
Гьюрматниинди дявдин 51851 частнан командир, полковник Г.Рублевский», – дибикIнайи думу кагъзиъ.
Му жюре кагъаз гъафи гьарсар дадайин юкIв рази шулу, хъа дадаси, ихь арайиъ гьамцдар лайикьлу баяр айивалиин учура шад шулача.
Улихьна вахтари гъардшар эвленмиш хьпан кьяляхъра, саб суфрайихъ сатIиди яшамиш шулийи. Велихановарин хизан 25 кIул кюлфетдикан ибарат вуйи. Гьадму аьхю хизандиъ Аьбдурашид ва Гъизигюл Велихановариз 1999-пи йисан декабрин вазлиъ гъи армияйиъ гъуллугъ гъабхурайи Багъир бабкан гъахьну. Хьур веледдин дада, бицIидар мектебдиъ урхури имиди, жилир уьмриан душну, ачIни гъахьнийи. Гъизигюли чан веледар сарди аьхю гъапIну. Мектеб ккудубкIбан кьяляхъра, чахьан удукьруси веледариз образование тувну. Риш Мадина, эвленмиш духьну, Сюгютдиъ мялимди лихура, Политехнический колледж ккудубкIну, Багъири Подмосковьейиъ эскервалин гъуллугъ гъабхура. Гъизигюлин шубурсана бали – Амири, Замири ва Сяидди – жюрбежюр колледжариъ урхура. Дурари чпин дадайихьна, сар-сарихьна вуйи гьюрмат гьаммишан уьбхюра. Бабан юкIв пашман дархьбан бадали, кIваъ айи ккунишин ва чпиз айи вари мумкинвалар ишлетмиш апIура.
Гьюрматлу Гъизигюл Закиевна! Яв веледарилан тина уьмрин рякъ акуб ибшрияв, хизандиан берекет затра кам дарибшрияв. Аллагьди худлар – гудлариз хъайивал апIуз мюгькам сагъ’вал тувривуз.
