Июндин 10-пи йигъан «Дагъустандин Огни шагьур» шагьрин округдин главайин вазифйир кIулиз адагъурайи Жалалутдин Аьлирзаевди муниципалитетдин образованиейин идарйир ахтармиш гъапIну.

 

Ахтармишар гъахбан метлеб – ЕГЭ тувру пунктарин гьязурлугъ’вал аьгъю апIуб вуйи. Шагьрин главайи образованиейин управлениейин ва уьмуми образованиейин идар-йирин кIулиъ айидарихьан арайиъ айи учIру месэлйирикан ва гъахру имтигьнарин шартIарикан гьерхуб-хъерхуб гъубхнийи.

Сюгьбат гъабхурайи вахт-наъ шагьрин кIулиъ айири 1-пи нумрайин мектебдин аьтрафариз фикир тувнийи ва мектебдин гьяят къайдайиз дубхну ккуниваликан гъапнийи. Чан терефнаан Жалалутдин Аьлирзаевди думу месэла гьял апIбаъ кюмек апIуз гаф тувну.

2020-пи йисан Урусатдиъ коронавирусдин тIягъвнин имтигьнар тувру вахт кьюб-шубубан дигиш гъапIнийи. Аьхирки, ЕГЭ тувру вахт вуди 3-пи июль тяйин дапIна. Шагьрин образованиейин управлениейин начальник Максим Аьлихановди ЕГЭ-йин иштиракчйирин хатIасузвал фици тямин апIуруш, ктибтнийи.

ЕГЭ гъабхру йишвариъ баяр-шубар фуну вахтнаъ вушра илтIикIуз шлу медпунктар а. Хъа гьаму йисан медицинайин гъуллугъчйирин ляхин, имтигьян тувуз учIврударин хиларин дезинфекция апIруси ва бедендин температура ебцруганси, дигиш дапIну ккунду.

Гьаци вуйиган, ЕГЭ гъабхру пунктариъ инсандин температура ебцру дакьатар, маскйир ва элгжар чарасуз ади ккунду. Гьарсаб имтигьян тувайиз улихьна, ЕГЭ гъабхру пунктнаъ дезинфекция апIувал чарасуз ву.